Të paktën 111 persona u vranë pasi një tërmet i fuqishëm goditi Kolumbinë perëndimore të hënën, duke rrëzuar ndërtesa në disa qytete dhe duke lënë të tjerë të bllokuar nën rrënoja.
Tërmeti goditi vetëm disa ditë pasi Abelardo De La Espriella u betua si president, duke e futur administratën e re në krizën e saj të parë madhore, dhe pak javë pasi dy tërmete shkatërruese goditën vendin fqinj,Venezuelën.
Tërmeti me magnitudë 7.4, sipas Shërbimit Gjeologjik të SHBA-së, goditi në një thellësi prej 107 kilometrash pranë San Jose del Palmarit, në Choco, një provincë në bregdetin e Paqësorit të Kolumbisë, por u ndje në qytetet e mëdha në mbarë vendin.
“Ka të ngjarë të ketë viktima dhe dëme të konsiderueshme dhe fatkeqësia potencialisht mund të jetë e përhapur”, paralajmëroi agjencia.
Numri më i lartë i raportuar i viktimave ishte në provincën perëndimore të Risaraldës, në rajonin e Kolumbisë ku kultivohet kafeja, ku guvernatori Juan Diego Patino, duke folur në telefon për televizionin Caracol, raportoi 42 viktima.
Tërmetet më të vogla nuk janë të pazakonta në Kolumbi, e cila përshkohet nga tri vargmale të Andeve. Megjithatë, janë rrëshqitjet e tokës ato që historikisht kanë qenë fatkeqësitë natyrore më vdekjeprurëse në vend, ku katastrofa e Armeros në vitin 1985 vrau rreth 25.000 persona.
Qytetet në rajonin e kafesë në vend, përfshirë Armeninë dhe Pereiran, u goditën nga një tërmet shkatërrues me magnitudë 6.2 në vitin 1999, i cili vrau më shumë se 1.000 persona.
De La Espriella, një politikan i krahut të djathtë që nuk kishte mbajtur më parë ndonjë post të zgjedhur, tha në një video të filmuar gjatë fluturimit drejt Bogotas se po pezullonte aktivitetet e tij të planifikuara për të udhëhequr përpjekjet për koordinimin e emergjencës nga kryeqyteti.
Autoriteti i Aviacionit Civil të Kolumbisë tha se fluturimet u pezulluan në aeroportet e Pereiras, Manizalesit, Quibdos, Armenisë, Cartagos dhe Buenaventuras, ndërsa inspektorët kontrollonin për dëme strukturore.
Sistemi i paralajmërimit për cunami i SHBA-së tha se nuk kishte kërcënim për cunami pas tërmetit.
Dëshmitarët e intervistuar nga agjencia e lajmeve Reuters në shtetin venezuelas të Tachiras, në kufi me Kolumbinë, dhe në qytetin qendror-perëndimor Barquisimeto raportuan se tërmeti ishte ndjerë edhe atje.
Venezuela u godit nga dy tërmete shkatërruese në qershor, të cilat vranë më shumë se 6.000 persona, kryesisht në bregdetin pranë kryeqytetit, Caracas.
