Të hënën, KFOR ka konfirmuar se ka nisur tranzicionin gradual të pranisë së përhershme të KFOR-it nga Ura Kryesore në Mitrovicë, në përputhje me përmirësimin e situatës së sigurisë në Kosovë, duke theksuar se kjo është pjesë e procesit për optimizimin e dislokimit të KFOR-it.
“Ky proces do të jetë gradual, i bazuar në kushte dhe po koordinohet ngushtë me të gjithë aktorët relevantë, përfshirë përfaqësuesit e Institucioneve në Kosovë dhe të organizatave ndërkombëtare, si dhe me përfaqësuesit e Policisë së Kosovës dhe të Misionit të Bashkimit Europian për Sundimin e Ligjit në Kosovë (EULEX). Shefi i Mbrojtjes i Serbisë, gjenerali Mojsilovic, është informuar rregullisht gjithashtu. Gjeneralmajor Ulutas, Komandanti i misionit të KFOR-it, mbetet në kontakt të ngushtë me të gjithë homologët e tij kryesorë në Institucionet e Kosovës, organizatat ndërkombëtare dhe Forcat e Armatosura të Serbisë”, u tha në përgjigjen e KFOR-it për Gazetën Express.
Të hënën te Ura e Ibrit ka qëndruar edhe Ministri në detyrë Xhelal Sveçla i cili e ka quajtur lajm të mirë këtë proces.
“Përgjegjësia për sigurinë në Urën e Mitrovicës do t’i kalojë gradualisht Policisë së Kosovës. Në një prononcim për media, Sveçla tha se procesi do të zhvillohet në koordinim të ngushtë me KFOR-in”, tha ai.
“Të gjithë jemi dëshmitarë të fillimit të një procesi ku përgjegjësia për sigurinë në Urën e Mitrovicës do t’i kalojë Policisë së Kosovës. Kjo vjen pas një pune të gjatë dhe të suksesshme të të gjitha institucioneve të sigurisë, pas sukseseve të njëpasnjëshme të Policisë së Kosovës në sigurimin e rendit dhe ligjit dhe në ofrimin e sigurisë për të gjithë qytetarët, pa asnjë dallim”, shtoi Sveçla.
Ai pastaj tha se prania e Policisë së Kosovës në Urë do të reduktohet gradualisht me përmirësimin e situatës së sigurisë.
“Patjetër që ky është një lajm i mirë. I gjithë procesi do të vijojë në koordinim të ngushtë me KFOR-in, i cili deri tani e ka pasur përgjegjësinë e sigurisë në këtë Urë. Sigurisht që, me përmirësimin e sigurisë, edhe vetë prezenca e Policisë së Kosovës do të reduktohet. Është një proces afatshkurtër, i cili do të ofrojë garanci për të gjithë se hapja e urës do të jetë një e mirë për të gjithë, pa pasur ndikim negativ te askush”, potencoi ai.
I pyetur për praninë e barrikadave dhe qarkullimin e veturave në këtë urë, Ministri në detyrë tha se po punohet që të ketë lajme të mira.
“Të gjithë jemi të angazhuar që ky proces të përfundojë në mënyrë sa ma mirë të mundshme. Shumë shpejt do të kemi lajmë tjera të mira”, ka theksuar ai.
The post Kur hiqen barrikadat dhe kur do të qarkullojnë veturat në Urën e Ibrit, Sveçla flet për koordinim me KFOR, pret lajme të mira appeared first on Gazeta Express.
