I ftuar në emisionin “Tempus”, hulumtuesi i lartë në Institutin e Kosovës për Drejtësi (IKD), Gzim Shala, tha se, sipas tij, Gjykata Speciale ka tejkaluar kufirin prej 15 vjetësh për dënimet për krime lufte, duke shqiptuar dënime deri në 25 vjet burgim.
“Sa i përket dënimit prej 15 vite, isha ndal shkurtimisht këtu te dënimi me burgim prej 15 viteve, dhe aspekte të tjera mund të prekin edhe procesin që aktualisht është duke u zhvilluar, për shkak se vendimet nuk janë të formës së prerë. Megjithatë, edhe në rastin e Komandant Calit, por edhe në jurisprudencën vendore të Kosovës, është konfirmuar se dënimi për krime të luftës nuk mund të shkojë mbi 15 vite, e që këtu, në fakt, gjykata ka shkuar përmbi 15 vite”, tha Shala.
Shala sqaroi arsyet pse, sipas tij, dënimi për krime lufte nuk mund të tejkalojë 15 vjet burgim.
“Për çfarë arsye nuk mund të shkojë mbi 15 vite? Kodi i ish-RFSJ-së kishte përcaktuar dënim deri me 15 vite apo burgim me vdekje. Në kohën e UNMIK-ut, dënimi me vdekje ishte larguar dhe kishte mbetur vetëm dënimi me 15 vite burgim. Pra, nuk ka pasur dënim tjetër, se kemi as sot dënimin me vdekje, se ai dënim ishte abroguar dhe, meqenëse dyshohet se këta i kanë kryer veprat penale para se të ishte abroguar ky dënim, pra me vdekje, i bie që dënimi që ka mbetur është 15 vjet. Ndërkohë, për mos me u kriju hapësirë më vonë që në secilin rast kur thuhet dënimi me vdekje të të lexohet si dënim me burgim deri 40 vjet, kodi ndërmjetës është më favorizues për palët dhe njëjtë ka qenë logjika pse në Kosovë nuk kemi mujt rastet e krimeve të luftës me i dënu mbi 15 vite burgim. Edhe logjika që e kanë përmendur specifikisht te rasti i Komandant Calit ka qenë e njëjtë. Pasi që ishte kthyer nga Supremja në Apel, ishte vendos të bëhej 15 vjet, ndërkaq në rastin konkret ka tejkalim që, pa asnjë arsyetim, shqipton dënim me 25 vjet dhe 18 vjet burg”, shtoi Shala.
The post Shala: Specialja tejkaloi afatet, pa asnjë arsyetim shqiptoi dënime deri në 25 vjet burgim appeared first on Gazeta Express.
