Ish-presidenti i Venezuelës, Nicolás Maduro, dhe bashkëshortja e tij, Cilia Flores, janë përballur me akuza të reja penale në Shtetet e Bashkuara, lidhur me pretendimet se kanë torturuar kundërshtarë politikë dhe shtetas amerikanë për të ruajtur pushtetin.

Sipas një aktakuze të ndryshuar të dorëzuar në gjykatën federale në Manhattan, Maduro dhe Flores akuzohen për komplot për kryerjen e torturës, përveç akuzave për trafikim droge me të cilat ishin përballur më herët.

Nëse shpallen fajtorë, të dy përballen me një dënim minimal të detyrueshëm prej 50 vjetësh burgim, shkruan reuters.

Ndërkohë, gjyqtari federal amerikan Alvin Hellerstein, i cili po mbikëqyr çështjen, ka refuzuar kërkesën e Flores për t’u liruar nga burgu para gjyqit për arsye shëndetësore.

Flores, 69 vjeçe, dhe Maduro, 63 vjeç, u kapën nga ushtria amerikane më 3 janar në shtëpinë e tyre në Caracas dhe u dërguan në Nju Jork, ku u përballën me akuzat për trafikim droge. Ata janë mbajtur në Qendrën e Paraburgimit Metropolitan në Brooklyn që nga arrestimi.

Prokurorët amerikanë pretendojnë se Maduro ka qenë i përfshirë në raste torture të kundërshtarëve politikë dhe personave të dyshuar si kërcënim për pushtetin e tij.

Në një nga rastet e përfshira në aktakuzë, prokurorët thonë se Maduro, në vitin 2013, urdhëroi arrestimin e një oficeri ushtarak venezuelian, të cilin e dyshonte se po planifikonte një grusht shteti.

Sipas prokurorëve, oficeri u mor në pyetje nga anëtarë të kundërzbulimit ushtarak venezuelian, të cilët e goditën rreth 20 herë me rrymë elektrike përmes një teli me tension dhe e varën nga duart dhe këmbët për disa minuta.

Një tjetër rast lidhet me një shtetas amerikan, i cili u ndalua teksa po hynte në Venezuelë në vitin 2022. Ai u akuzua se po komplotonte për vrasjen e Maduros dhe, sipas aktakuzës, u torturua nga oficerët e kundërzbulimit ushtarak përmes rrahjeve dhe goditjeve elektrike në krahë, këmbë dhe në organet gjenitale.

“Që nga kapja dhe arrestimi i tyre, Departamenti i Drejtësisë ka punuar për të zbuluar përmasat e krimeve të tyre të dyshuara kundër popullit të Venezuelës dhe të Shteteve të Bashkuara”, tha Prokurori i Përgjithshëm amerikan, Todd Blanche.

Maduro dhe Flores janë deklaruar të pafajshëm për akuzat për trafikim droge. Gjyqi ndaj tyre është planifikuar të nisë më 1 qershor 2027.

Akuzat e reja shënojnë herën e parë që Maduro përballet me akuza penale në SHBA lidhur me pretendimet për torturë, ndonëse zyrtarët amerikanë dhe organizatat për të drejtat e njeriut e kanë akuzuar prej vitesh regjimin e tij për torturimin e të ndaluarve. /Telegrafi/