Jared Kushner ka reaguar ndaj raportimeve në mediat amerikane për projektin e planifikuar në zonën e Zvërnecit në Shqipëri, duke mohuar se toka i është dhënë nga qeveria shqiptare.
Kushner ka deklaruar se toka është blerë përmes një transaksioni privat për 230 milionë euro, ndërsa investimi i përgjithshëm, nëse projekti realizohet, mund të arrijë në rreth 4 miliardë euro.
“Toka nuk na u dha nga qeveria shqiptare. Partnerët tanë e blenë atë nga një palë private për 230 milionë euro në një transaksion privat”, ka shkruar Kushner.
Sipas tij, pronësia e tokës është verifikuar nga këshilltarët ligjorë para se të vazhdohej me projektin.
Kushner ka thënë se projekti është një investim privat dhe se puna për të ka zgjatur më shumë se tre vjet, gjatë së cilës janë shpenzuar dhjetëra miliona dollarë për studime të terrenit, mjedisit dhe nevojave të zonës.
Ai ka deklaruar se, nëse realizohet, projekti mund të sjellë rreth 4 miliardë euro investime, vende të reja pune dhe aktivitet ekonomik në Shqipëri.
Në projekt, sipas tij, janë përfshirë arkitektë, dizajnerë, inxhinierë dhe ekspertë mjedisorë. Kushner ka përmendur edhe partnerët e tij, përfshirë Asher Abehsera dhe familjen shqiptare Kastrati.
Ai ka mohuar gjithashtu se projekti ka përparuar për shkak të lidhjeve të tij me presidentin amerikan Donald Trump, duke theksuar se interesi për zonën kishte nisur në vitin 2021, para se Trump të shpallte kandidaturën për zgjedhjet presidenciale të vitit 2024.
Kushner ka folur edhe për aspektin mjedisor, duke thënë se synimi është që projekti të zhvillohet sipas standardeve të larta dhe që zona të ketë më shumë biodiversitet.
Ai ka theksuar se projekti duhet të kalojë të gjitha procedurat rregullatore dhe mjedisore në Shqipëri dhe të marrë miratimet përkatëse.
“Nëse miratohet, shpresoj që të mund të krijojmë diçka për të cilën shqiptarët të jenë krenarë dhe që familjet nga Shqipëria dhe anembanë botës ta shijojnë për breza me radhë”, ka përfunduar Kushner.
Sinjali – aty ku e vërteta flet para lajmit!
The post Kushner për projektin në Zvërnec: Nuk na e dha qeveria, toka u ble nga privatët appeared first on Sinjali.
Burimi: Sinjali
