Zëdhënësja e Ministrisë së Punëve të Jashtme të Rusisë, Maria Zakharova, shfrytëzoi aktgjykimin e shkallës së parë ndaj ish-udhëheqësve të UÇK-së në Hagë për të plasuar një narrativë më të gjerë politike për Kosovën, duke e paraqitur procedurën gjyqësore si pjesë të një përpjekjeje të pretenduar për të ‘pastruar’ Kosovën nga ‘trashëgimia e saj e përgjakshme’.
Duke komentuar vendimin ndaj Hashim Thaçit, Kadri Veselit, Rexhep Selimit dhe Jakup Krasniqit, Zakharova vlerësoi se vendimi i Dhomave të Specializuara është ‘i vonuar dhe i dyshimtë’, ndërsa katër të akuzuarit i cilësoi si „militantë kosovarë-shqiptarë“ të cilët duhet të përgjigjen për ‘krimet ndaj serbëve’.
Dhomat e Specializuara më 16 shtator shpallën aktgjykimin e shkallës së parë sipas të cilit Thaçi, Veseli, Selimi dhe Krasniqi u shpallën fajtorë, ndërkohë që u liruan nga gjashtë pika të akuzës për krime kundër njerëzimit, si dhe u shpallën të pafajshëm për disa pretendime të tjera.
Aktgjykimi nuk është i plotfuqishëm dhe mund të kontestohet me ankesë.
Human Rights Watch pas aktgjykimit deklaroi se lënda i kushtohej përgjegjësisë individuale penale të katër të akuzuarve, e jo UÇK-së si organizatë apo legjitimitetit të qëllimit me të cilin luftoi UÇK-ja.
Zakharova njëkohësisht përdor faktin se disa krime të kryera pas përfundimit të luftës nuk ishin lëndë e këtij aktgjykimi për të mbështetur pretendimin për injorimin e pretenduar të viktimave serbe
Pretendimi i Zakharovës se vendimi është ‘i dyshimtë’ mbetet gjithashtu një vlerësim politik, e jo konkludim i ndonjë gjykate të shkallës së dytë apo gjykate tjetër ndërkombëtare. Aktgjykimi është i shkallës së parë, që do të thotë se qëndrueshmëria e tij juridike do të jetë lëndë e procedurës eventuale të ankimimit.
Përkundrazi nga Zakharova, organizatat ndërkombëtare që reaguan menjëherë pas aktgjykimit nuk e paraqitën atë si një proces politik kundër Kosovës.
Një pjesë e rëndësishme e aktgjykimit që shtypet në deklaratën e Zakharovës është fakti se gjykata nuk i pranoi të gjitha akuzat e Prokurorisë. Katër ish-udhëheqësit e UÇK-së u liruan nga akuzat për krime kundër njerëzimit, pasi Prokuroria nuk e provoi tej dyshimit të bazuar të gjithë elementet e këtyre veprave penale.
Gjykata gjithashtu konstatoi se disa pretendime konkrete për krime me të vërtetë nuk u provuan ose nuk ishin nën juridiksionin e saj.
Kjo tregon se aktgjykimi nuk mund të thjeshtohet as në pretendimin njëanshëm se gjykata ‘dënoi UÇK-në’, e as në interpretimin e kundërt politik se bëhet fjalë për një përpjekje për të ‘larë’ apo ‘pastruar’ Kosovën nga trashëgimia e pretenduar.
Në deklaratën e Zakharovës, megjithatë, pikërisht ky thjeshtësim zë vendin qendror. Procesi gjyqësor paraqitet përmes konfliktit ndërmjet Serbisë dhe Kosovës, ndërsa çështjet juridike të përgjegjësisë individuale penale shtyhen në plan të dytë./The Geopost/
The post Zakharova shpërndan narrativen propagandistike për aktgjykimin ndaj ish-udhëheqësve të UÇK-së appeared first on Gazeta Express.
