Shtetet e Bashkuara e kanë ftuar presidentin rus Vladimir Putinin të marrë pjesë në takimin e G20-ës të planifikuar në Miami në dhjetor, në atë që do të jetë samiti i parë i madh me udhëheqësin rus të pranishëm që kur ai nisi pushtimin e Ukrainës në vitin 2022.
Ftesa, e cila shënon një përmbysje të rëndësishme nga administrata Trump e izolimit ndërkombëtar të Rusisë, u njoftua nga Marco Rubio, sekretari i shtetit i SHBA-së, gjatë një konference për shtyp në margjinat e konferencës së Kombeve të Bashkuara në Nju Jork.
“E kemi ftuar Presidentin Putin në G20”, tha Rubio në një konferencë për shtyp të transmetuar në televizion pas një takimi me ministrin e jashtëm rus Sergei Lavrov, të cituar nga Guardian.
“Mendojmë se është një mundësi për të që të angazhohet jo vetëm me [Trump], por edhe me udhëheqës të tjerë botërorë. Shpresojmë që kjo të jetë një ftesë që ai do ta pranojë”, tha ai.
Kremlini ende nuk i është përgjigjur publikisht ftesës, e cila ka të ngjarë të ngrejë shqetësime nga Ukraina dhe udhëheqës të tjerë evropianë.
Rusia mbetet anëtare e G20-ës , por Putini nuk ka marrë pjesë në një samit të këtij organi që nga viti 2019.
Ai ndoqi një seancë virtualisht në vitin 2023. Samiti i dhjetorit do të zhvillohet në klubin e golfit Trump National Doral.
Rubio e formuloi ftesën duke thënë se Trump ishte i gatshëm të takohej “pothuajse me këdo” dhe se “për të zgjidhur problemet, duhet të takohesh me njerëz me të cilët nuk pajtohesh”.
Ai tha se Trump mbeti i hapur për t’u takuar me Putinin kokë më kokë në forume të tjera, nëse “ka një qëllim pas takimit”.
G20 është një forum i ekonomive më të mëdha në botë dhe përfshin Bashkimin Evropian, Kinën, Indinë, Shtetet e Bashkuara, Mbretërinë e Bashkuar dhe vende të tjera të mëdha.
