Presidenti i Shteteve të Bashkuara, Donald Trump, ka thënë se do të takohet me liderin e Koresë së Veriut, Kim Jong-un, më vonë gjatë këtij viti, raporton Euronews.
Trump i bëri këto deklarata të mërkurën, disa ditë pasi njoftoi se kishte urdhëruar zvogëlimin e stërvitjeve të përbashkëta ushtarake të SHBA-së me Korenë e Jugut.
Duke iu përgjigjur pyetjeve të gazetarëve për komunikimet me liderin koreano-verior, Trump tha se shkon “shumë mirë” me Kim Jong-un.
Ai pretendoi gjithashtu se Koreja e Veriut ka “57 armë bërthamore shumë të fuqishme”.
“Fakti që unë shkoj mirë me të, është një gjë e mirë, jo e keqe”, tha Trump.
Presidenti amerikan nuk dha detaje të tjera për takimin e paralajmëruar. Nëse realizohet, ai do të ishte takimi i parë mes Trumpit dhe Kim Jong-un që nga mandati i parë i Trumpit në Shtëpinë e Bardhë.
Sipas Euronews, kreu i Agjencisë Ndërkombëtare për Energji Atomike, Rafael Grossi, kishte deklaruar në prill se Koreja e Veriut po shënonte një “rritje shumë serioze” të kapaciteteve për prodhimin e armëve bërthamore.
Koreja e Veriut ka kryer gjashtë teste të konfirmuara bërthamore që nga viti 2006.
The post Trump paralajmëron takim me Kim Jong-un appeared first on Gazeta Express.
