Në një konferencë për shtyp, Ministri i Mbrojtjes në Shqipëri, Ermal Nufi, deklaroi se Shqipëria po hyn në një fazë të re të marrëdhënieve me NATO-n, të njohur si “NATO 3.0”, e cila kërkon më shumë përgjegjësi dhe aftësi mbrojtëse.
Ai theksoi se vendi po përgatitet për investime strategjike dhe modernizimin e Forcave të Armatosura, duke i konsideruar shpenzimet ushtarake si një investim për sigurinë kombëtare dhe stabilitetin.
“Koha do të përcaktohet nga vetë Aleanca dhe organizimi është dëshmia më e madhe e besimit për Shqipërinë. Shqipëria dhe NATO po hyjnë në një fazë të re, NATO 3.0, një NATO më e përgatitur, më e aftë dhe që kërkon më shumë përgjegjësi. Shqipëria po përgatitet për investime në mbrojtje, fuqizimin e infrastrukturave strategjike. Diskutimi është çfarë kapacitetesh do të ndërtohen me këto para.”
Sipas tij, ndërtimi i kapaciteteve të reja mbrojtëse do të bëhet në kuadër të sistemit kolektiv të Aleancës, e cila do të përcaktojë edhe kohën e organizimit si dëshmi besimi ndaj Shqipërisë.
Nufi tha se Ballkani Perëndimor mbetet kyç për sigurinë europiane, ndërsa njoftoi se kontratat janë nënshkruar dhe brenda këtij viti pritet mbërritja zyrtare e avionëve, të cilët do të ndihmojnë edhe në përballimin e emergjencave si zjarret.
“Ballkani Perëndimor është i rëndësishëm për sigurinë europiane. Shpenzimet për mbrojtjen janë investim për sigurinë kombëtare, stabilitetin e vendit dhe të ardhmen e Shqipërisë. Shqipëria po ndërton kapacitetet e saj si pjesë e një sistemi kolektiv të mbrojtjes së NATO-s. Prioriteti më i madh i Ministrisë së Mbrojtjes ka qenë dhe mbetet modernizimi i Forcave të Armatosura.”
Deklaratën e ministres serbe Snezhana Paunoviç për spastrimin etnik të Kosovës, ministri e quajti “të papranueshme.”
“Deklarata është skandaloze, e papranueshme. Çdo koment tjetër është i pavend. Është e papranueshme sot që të ketë një deklaratë të tillë. Bashkohem plotësisht me reagimin e kryeministrit. Edhe vetë reagimi në Serbi ka treguar që vazhdojmë të kemi atë qëndrim europian.”
Në fund, ai vlerësoi se reagimet në Serbi treguan se Shqipëria vazhdon të mbajë një linjë të qartë konstruktive dhe europiane.
“Janë nënshkruar kontratat. Është një investim i jashtëzakonshëm për kapacitetet në RSH. Brenda këtij viti avionët janë zyrtarisht, besoj edhe për pjesën e zjarreve. Pajisemi me kapacitete maksimale”, tha ai./Tvklan
