24.4 euro për ton thëngjill.
Ky është çmimi me të cilin KEK-u do t’ia shesë thëngjillin Maqedonisë së Veriut.
Marrëveshja u bë së fundmi mes dy kompanive publike KEK dhe ESM.
Këtë e bëri të ditur ministrja në detyrë e Ekonomisë, Artane Rizvanolli.
Shitja e thëngjillit do të bëhet për tri vite, ndërkaq vlera e marrëveshjes mund të arrij deri në 73.2 milionë euro.
Thëngjilli do të nxirret në Kosovë dhe më pas do të transportohet drejt Maqedonisë së Veriut.
Por, sa është kjo marrëveshje në interes të Kosovës?
“Mendoj që është një pozitive për bilancin tregtar, do të thotë do të kemi një rritje të eksportit dhe ose ngushtim të bilancit tregtar, nëse do të thotë të tjerat parametra kanë me qenë të njëjta nuk do të ketë rritje të importit. Në anën tjetër, çka mendoj që është shitja e pasurisë së Kosovës, do të thotë në këtë rast e thëngjillit, pa e përpunuar, do të thotë pa ia rritur vlerën, është një shitje me çmim shumë të lirë. Mendoj që më mirë do të ishte që Kosova do të ishte që të investonim në termocentralet e reja, t’i pasivizojmë këto që kanë arritjen e kapaciteteve që ne mund të eksportojmë energji elektrike që prodhohet prej prej këtij thëngjilli, vlerëson Fidan Qerimi ekonomist.
Përveç anës ekonomike, rëndësi ka edhe mënyra se si do të realizohet ky transport.
“Sa i përket problemeve ambientale ato bien jo mbi Kosovën që e bën eksportimin e këtij produkti por kryesisht tek ata që e konsumojnë e në këtë rast Maqedonia e kështu Maqedonia e merr përsipër për problemet ambientale apo qëllimet e saj klimatike, një pikë shumë me rëndësi që duhet me u cek brenda kësaj kontrate është forma se si do të transportohet ky thëngjill nga Obiliqi deri në Maqedoni për shkak që është shumë me rëndësi që ky transport të mos behet në autostradën “Ibrahim Rugova” por të bëhet nëpërmjet hekurudhës, meqë rast edhe hekurudha i krijon disa të hyra dhe kështu nuk kemi dëmtim të autostradës”, thotë Adhurim Haxhimusa-ekspert i energjisë.
Por, kjo marrëveshje nuk po shihet njësoj nga të gjithë.
Deputetja e LDK-së, Janina Ymeri, e konsideron atë më shumë politike sesa ekonomike.
“Marrëveshja është politike, më shumë se sa ekonomike ose profitabile në aspektin teknik dhe ekonomik, është marrëveshje me negociata edhe ka pas mundësi të bëhet shumë më mirë me profit shumë ma të mirë edhe me investime që kishin pasë me rrjedh pas marrjes së thëngjillit mirëpo këta kanë vendos me shit vetëm thëngjillin, dicka që e kish bo një nxënës i shkollës fillore pa problem. Nuk është e dëmshme në kuptim të parë edhe konkretisht e dëmshme në specifika të caktume por është marrëveshje që e mban peng Kosovën për 3 vjet për marrje të thëngjillit dhe bllokon investime tjera që këta asnjëherë nuk i kanë lon tu u marr me shitje te thëngjillit e herë me ndërmjetësim”, shprehet ajo.
Kontrata, sipas ministres në detyrë Artane Rizvanolli, nuk do të ndikoj në prodhimin e energjisë elektrike në Kosovë.
Ajo ka sqaruar se kompania publike e Maqedonisë së Veriut, ESM, do të jetë përgjegjëse për eskavimin dhe transportin e thëngjillit të cilin do ta blejë.
