Kina ka shënuar një hap të rëndësishëm në zhvillimin e aviacionit elektrik, pasi aeroplani CE-25A, i prodhuar nga kompania COMAC, ka realizuar për herë të parë një fluturim testues me ekuipazh në bord.
Fluturimi u zhvillua të shtunën në Binzhou, në provincën Shandong, me dy pilotë dhe një inxhinier testues në bord.
Sipas COMAC, të gjitha sistemet e aeroplanit funksionuan normalisht.
CE-25A kishte realizuar më parë 19 fluturime autonome pa ekuipazh, që nga 2 shkurti, ndërsa tani po kalon në fazën e certifikimit nga autoritetet kineze të aviacionit civil.
Aeroplani ka kapacitet prej 19 ulësesh, peshon rreth 10 tonë dhe përdor dhjetë ventilatorë elektrikë, nga pesë në secilin krah.
Sipas prodhuesit, ai mund të arrijë shpejtësi fluturimi prej 300 kilometrash në orë dhe ka një autonomi deri në 400 kilometra, duke u projektuar kryesisht për udhëtime të shkurtra rajonale.
Në zhvillimin e aviacionit elektrik, COMAC bashkëpunon edhe me gjigantin kinez të baterive CATL.
Megjithatë, ende nuk është konfirmuar se çfarë lloji baterish përdor CE-25A.
Kina nuk është e vetmja që po investon në këtë teknologji.
Kompania Heart Aerospace ka testuar gjithashtu aeroplanin e saj elektrik X1, ndërsa synon të zhvillojë modelin ES-30 me 30 ulëse.
Pavarësisht përparimit, aeroplanët elektrikë vazhdojnë të përballen me kufizime sa i përket autonomisë dhe kapacitetit të baterive.
COMAC nuk ka njoftuar ende se kur CE-25A mund të hyjë në shërbim komercial, por fluturimi i parë me ekuipazh konsiderohet një hap i rëndësishëm drejt përdorimit të energjisë elektrike në transportin ajror. /Telegrafi/
