Kompania amerikane Jeep ka nxjerrë në ankand një model të veçantë të Wrangler Commando 392, me fuqi prej 705 kuaj-fuqi, ndërsa të gjitha të ardhurat nga shitja do t’i dhurohen organizatës United Service Organizations (USO), e cila mbështet ushtarakët amerikanë dhe familjet e tyre.
Bëhet fjalë për njësinë e fundit të një serie prej 250 automjetesh të prodhuara. Nga këto, 249 ishin rezervuar ekskluzivisht për pjesëtarët e kualifikuar të ushtrisë amerikane dhe veteranët, ndërsa automjeti i fundit është vënë në dispozicion për publikun përmes ankandit.
Ankandi nisi më 11 nëntor 2026 në platformën Bring a Trailer dhe do të përfundojë më 22 nëntor. Sipas raportimeve të mediave automobilistike, nuk është përcaktuar çmim minimal, kështu që automjeti do t’i shitet ofertuesit më të lartë.
E gjithë shuma e ofertës fituese, përfshirë edhe tarifën e blerësit që përfiton platforma, do t’i kalojë organizatës USO.
Interesimi për këtë seri ka qenë i madh. Për 249 automjetet e paraqitura për ushtarakët dhe veteranët ishin regjistruar më shumë se 4.700 aplikime. Për njësinë e fundit, Jeep vendosi të krijojë një version të veçantë, duke e kthyer shitjen e saj në një nismë humanitare.
Wrangler Commando 392 i nxjerrë në ankand dallohet nga ngjyra e gjelbër ushtarake, grafikat Commando dhe USO, si dhe rrotat me përfundim bronzi. Ndërsa modelet e tjera të serisë kanë dizajn me motive kamuflazhi.
Përveç pamjes, automjeti veçohet edhe për fuqinë e tij. Ai bazohet në Wrangler 392 me motor 6.4-litërsh Hemi V8, i cili në konfigurimin standard prodhon 470 kuaj-fuqi.
Megjithatë, ky version është modifikuar nga Fox Factory Vehicles, e cila i ka instaluar një supermbushës Whipple prej 3.0 litrash, duke e rritur fuqinë në 705 kuaj-fuqi.
Automjeti është pajisur edhe me pezullim të ngritur 3.5 inç, amortizatorë Fox 3.0 Internal Bypass dhe goma Nitto Ridge Grappler 37-inç, të projektuara për përdorim edhe në terrene të vështira.
Me përfundimin e ankandit më 22 nëntor, ky Wrangler i veçantë do të marrë pronarin e ri, ndërsa të ardhurat nga shitja do të shërbejnë për të mbështetur ushtarakët amerikanë dhe familjet e tyre.
Sinjali – aty ku e vërteta flet para lajmit!
Burimi: Sinjali
