Fikja e ngrohjes sa herë që dilni nga shtëpia mund të duket si një mënyrë e mirë për të kursyer energji, por kjo nuk vlen për çdo sistem ngrohjeje.

Në disa raste, ulja e temperaturës mund të ndihmojë në reduktimin e faturave, ndërsa në të tjera është më mirë që ngrohja të funksionojë në mënyrë të moderuar dhe të qëndrueshme.

Sipas rekomandimeve të Departamentit Amerikan të Energjisë dhe Fondit Britanik për Kursimin e Energjisë, gjithçka varet nga pajisja që përdorni.

Kaldaja: Ulja e temperaturës ndihmon në kursim

Nëse shtëpia ngrohet me kaldajë, mbajtja e ngrohjes ndezur gjatë gjithë ditës, edhe kur askush nuk është në shtëpi, mund të rrisë shpenzimet. Për këtë arsye, rekomandohet ulja e termostatit gjatë orëve kur jeni larg ose kur flini.

Departamenti Amerikan i Energjisë vlerëson se ulja e temperaturës me rreth 4 deri në 6 gradë Celsius për tetë orë në ditë mund të sjellë kursime deri në 10 për qind në vit në shpenzimet e ngrohjes dhe ftohjes.

Ngrohja e shtëpisë përsëri nuk i anulon kursimet

Një keqkuptim i zakonshëm është se kaldaja shpenzon më shumë energji kur duhet ta ngrohë shtëpinë përsëri pasi temperatura ka rënë. Megjithatë, kjo nuk është e vërtetë.

Kur temperatura brenda shtëpisë është më e ulët, humbja e nxehtësisë drejt ambientit të jashtëm ngadalësohet. Kjo do të thotë se mbajtja e një temperature më të ulët për disa orë mund të sjellë kursime, edhe nëse më vonë duhet ta ngrohni shtëpinë përsëri.

Pompa e nxehtësisë: Temperatura e qëndrueshme është më e favorshme

Situata ndryshon kur përdorni pompë nxehtësie, përfshirë kondicionerët që shërbejnë për ngrohje.

Në këtë rast, ulja e madhe e temperaturës mund të ndikojë në efikasitetin e pajisjes dhe të zvogëlojë kursimet e pritshme. Departamenti Amerikan i Energjisë rekomandon një temperaturë të moderuar dhe të qëndrueshme, përveç rasteve kur përdoret një termostat i posaçëm për pompat e nxehtësisë.

Sa gradë duhet të jetë temperatura në shtëpi?

Fondi Britanik për Kursimin e Energjisë rekomandon që termostati të vendoset përgjithësisht ndërmjet 18 dhe 21 gradëve Celsius.

Sipas përllogaritjeve të tij, edhe ulja e temperaturës nga 22 në 21 gradë mund të sjellë kursime të konsiderueshme gjatë vitit.

Prandaj, përpara se ta fikni ngrohjen sa herë dilni nga shtëpia, kontrolloni fillimisht llojin e sistemit që përdorni. Ajo që kursen energji në një pajisje, nuk është domosdoshmërisht zgjidhja më ekonomike për një tjetër. /Telegrafi/