Kandidati për kryeministër i PDK-së, Bedri Hamza, ka deklaruar tri banesa, njërën në emër të bashkëshortes, një shtëpi të trashëguar, tri garazhe dhe një tokë. Po ashtu, ka deklaruar dy vetura në emër të fëmijëve dhe bashkëshortes. Ai ka deklaruar 10 mijë e 765 euro para të gatshme, si dhe mbi 2 mijë euro të bashkëshortes dhe fëmijëve.
Hamza ka deklaruar edhe dy kredi aktive. Të hyra vjetore ka deklaruar 19 mijë e 694 euro, si dhe afër 13 mijë euro të hyra nga bashkëshortja dhe fëmijët.
Ndërsa deputeti i ri, që dikur ishte nënkryetar i Hamzës, del të jetë kursimtar i madh.
Arian Tahiri, në vitin 2022, ka blerë banesë në vlerë 118 mijë euro, si bashkëinvestim me bashkëshorten, përmes ndërrimit të banesës paraprake dhe kredisë bankare.
Po atë vit, ai ka blerë edhe garazhë në vlerë 6 mijë euro si bashkëinvestim me bashkëshorten, si dhe parking në vlerë 9 mijë euro në emër të bashkëshortes.
Në vitin 2022, Tahiri ka deklaruar edhe një veturë të blerë për 30 mijë euro, me kursime dhe kredi, në emër të bashkëshortes.
Në emër të bashkëshortes ai ka deklaruar edhe një banesë në vlerë 35 mijë euro, të blerë në vitin 2025. Po atë vit, ai ka blerë edhe një veturë në vlerë 18 mijë euro, për të cilën ka thënë se paratë i ka siguruar nga kursimet personale dhe mbështetja nga anëtarët e familjes.
Ndonëse ka blerë banesë, vetura, parking e garazhe nga kursimet, Tahirit i kanë mbetur edhe 39 mijë e 370 euro para të gatshme. Ai ka deklaruar edhe afër 15 mijë euro (14,773 euro) nga pagat e prindërve dhe bashkëshortes, si dhe 2 mijë e 200 euro në llogari të fëmijëve.
Sa i përket të hyrave vjetore, ai ka deklaruar 14 mijë e 208 euro si pagë, pa treguar institucionin, më pas 12 mijë e 923 euro të hyra nga Komuna, 4 mijë e 950 euro dividentë nga kompania e tij dhe 7 mijë e 500 euro nga shitja e veturës. Po ashtu, mbi 53 mijë euro ka deklaruar të hyra nga bashkëshortja dhe prindërit.
Deputeti Tahiri, në emër të prindërve, ka deklaruar pyje, ara, toka, livadhe, kullosa dhe shtëpi, të gjitha të trashëguara, në vlerë prej 223 mijë euro.
Megjithatë, ndonëse ka deklaruar se banesën dhe veturën i ka blerë me kredi, Tahiri nuk ka dhënë asnjë detaj për shumën dhe periudhën e kthimit të këtyre kredive.
Tahiri nuk u është përgjigjur pyetjeve të “Betimi për Drejtësi” nëse ka ndonjë kredi aktive.
Për më shumë, ndiqeni emisionin “Kosova vendi i dytë në Evropë për varfëri, por me politikanë të pasur”, në TV dhe platformat online të “Betimi për Drejtësi”.
The post Bedri Hamza deklaron tri banesa, një shtëpi, tri garazhe dhe mbi 10 mijë euro para të gatshme appeared first on Gazeta Express.
