Punën e nisë çdo ditë në ora 08:00 të mëngjesit.
Në këtë formë, Ramadan Osmani, nga e hëna deri të premten është në shërbim të qytetarëve.
E gjitha kjo, si zyrtar i gjendjes civile në Komunën e Prishtinës.
Këtë punë, Osmani thotë se e bën që 30 vite.
“Duke filluar nga 99 ka ndryshuar se për çdo gjë është dashur me prit më tepër se tre muaj për një çertifikat, ndërsa sot në mënyrë të digjitalizuar mundesh me marr deri në një minutë”, shprehet Osmani.
E 23 qershori, shënon edhe Ditën Ndërkombëtare të Shërbyesve Civilë.
Por, edhe ky vit, punëtorët e administratës publike po i gjen me probleme të shumta.
Ndër to, edhe paga e ulët.
“Problem ne kemi të shumta, por ajo se çka është më me rëndësi është paga. Ne si zyrtarë të gjendjes civile paguhemi me koeficient 4.0, kurse akteemrimet i kemi me koeficiente 5.1, duke filluar me 18/11/2024 në letrën që e ka nënshkruar ushtruesi i burimeve njerëzore është 5.1 kurse ne paguhemi me 4.0. Një zyrtarë me 4.0 me përvojë punë afro 30 vite e ka rrogën 550 euro me stazh e me të gjitha”, thotë Osmani.
I njëjti shpreson që Dita Ndërkombëtare e Shërbyesve Civili në vitin e ardhshëm të i gjejë më mirë.
“Duhet me na barazuar me koeficient me drejtoritë e tjera, pastaj duke filluar me inventarin e punës, kompjuterët i kemi të vjetruar karriget e vjetruara. Përndryshe në këto kushte ndoshta punohet, por nuk janë të mjaftueshme duhet që zyrtarët të mos janë qa të ngarkuar me një zyre shtatë apo tetë persona, por mjafton dy apo tre persona”, shprehet ky shërbyes civilë.
E me hallet që përballen shërbyesit civil, janë të njoftuar edhe Sindikata e Pavarur e Administratës së Kosovës.
“Fatkeqësisht shërbimin civile dhe kjo datë e gjenë jo mirë për arsye sepse kemi bërë vazhdimisht kërkesa tek Qeveria e Republikës së Kosovës për rritje të pagave ajo nuk ka ndodh. Kemi kërkua në vazhdimësi kushte më të mira të punës, zbatimin e ligjit për sigurime shëndetësore dhe jetësore, edhe tani që po flasim nuk kemi marrëveshje kolektive të përgjithshme”, thotë Alush Gashi.
Ndryshe 23 Qershori Dita e Shërbyesve Civilë, në botë ka filluar të shënohet me vendim nga Asambleja e Përgjithshme e Kombeve të Bashkuara më 20 dhjetor 2002.
