Kandidati për kryeministër nga Lidhjet Demokratike të Kosovës, Lumir Abdixhiku, vlerëson se partia që udhëheq ka një program të jashtëzakonshëm teksa shton se është gati të ballafaqohet me këndo për pikat e planprogramit.
I ftuar në “Debat Plus”, Abdixhiku u zotua se për tri vitet e ardhshme do t’i përfundojë të gjithë autostradat që kanë mbetur tash e sa vjet në gjysmë.
“Mua më duhet nesër me ditë nëse ministri i Infrastrukturës a e ka nisur ditën në autostradën e Anamoravës apo jo, du me përfundu autostradën e Gjilanit për një vit e gjysmë se s’ka as tunele as ura se kemi problemi e parave se Kosova është është vend i pasur dhe se ka problem gjenerimin e parave. Njësoj duhet me i thënë edhe atij për Mitrovicë, për Pejë e për Gjakovë, për Podujevë e për Gjilan– rrugët që kanë nisë duhet të përfundohen për tri vjet”, u shpreh Abdixhiku.
Abdixhiku, mes tjerash, u shpreh se kudo gjatë fushatës qytetarët janë ankuar për rritjen e çmimeve për çka u shpreh se në javën e parë do të hiqte TVSH-në për produktet bazë dhe nuk do të lejonte rritjen e çmimit të rrymës më.
Ai, mes tjerash, u shpreh se nën qeverisjen e tij do të ketë edhe rritje të pagave në sektorin publik e kushte shumë më të mira për punëtorët e sektorit privat.
“Dita e vërtetë e Kosovës nis të hënën, nesër është dita e popullit të Kosovës. Kudo që kemi shku me Vjosën në ‘hajde flasim’ ka qenë ankesa për çmimet e larta dhe ne u kemi thënë se menjëherë do të heqim TVSH-në për çmimet bazike si qumësht, miell, vaj, vezë – veç një javë qeverisje e heq, i thirri 10 marketet më të mëdha të Kosovës dhe u them se po e heqim TVSH-në dhe s’dua të rritet çmimi i asnjë produkti. Nuk do të ketë rritje të çmimit të rrymës më për asnjë cent dhe nuk mund të themi çdo ditë se çmimet po rriten dhe po vazhdojmë tutje dhe e treta është rritja e pagës – do të ketë menjëherë rritje në sektorin publik për shkak të koeficientit 150, mësuesit i bëhet rroga 1000 euro, ushtarit e policit paga bazë 900 euro e zjarrfikëseve do t’ju bëhet paga 900 euro. Ne e kemi edhe sektorin privat që s’kanë ligj të punës e punojnë pa kontrata të drejtat e punëtorëve duhet të trajtohen si të gjithë të tjerët”, u shpreh Abdixhiku.
