Presidenti ukrainas Volodymyr Zelensky, ka marrë vëmendje gjatë vizitës së tij në Kombet e Bashkuara në Nju Jork, pas një takimi të shkurtër dhe të tensionuar me gazetarë rusë.
Siç shihet në një video që është bërë virale, ndërsa Zelensky, së bashku me delegacionin e tij, po kalonte pranë gazetarëve, një gazetar rus e pyet disa herë se kur do të shkonte në Moskë.
Pasi kishte bërë disa hapa larg, Zelensky mbuloi gojën me dorë dhe u përgjigj: “Me raketë, dreqi e mori.”
Gjatë punimeve të Asamblesë së Përgjithshme të Kombeve të Bashkuara, Zelensky mbajti gjithashtu një fjalim dhe e paralajmëroi Rusinë se dimri i ardhshëm do të jetë i dhimbshëm për të, nëse nuk arrihet një marrëveshje për armëpushim lidhur me sulmet ndaj infrastrukturës.
Gjatë fjalimit të tij në Asamblenë e Përgjithshme, lideri ukrainas paralajmëroi se lufta ruse mund të përhapet në pjesën tjetër të Evropës, duke bërë thirrje për presion më të madh ekonomik ndaj Moskës.
Ai theksoi veçanërisht rrezikun që paraqet zhvillimi i teknologjisë, duke paralajmëruar se që vitin e ardhshëm inteligjenca artificiale mund të marrë vendime në fushën e betejës. Për këtë arsye, sipas tij, është e nevojshme që paqja të arrihet sa më shpejt. Zelensky gjithashtu akuzoi Rusinë se në radhët e saj përdor ushtarë nga 47 shtete, përfshirë Indinë.
The post Gazetarët rusë e pyesin se kur do të shkojë në Moskë, Zelensky bëhet viral me përgjigjen e tij: “Me raketë” appeared first on Gazeta Express.
