Analisti i politikës së Ballkanit, Jasmin Mujanoviq, ka reaguar pas zbulimit të dy varrezave masive në veri të Kosovës, përkatësisht në komunën e Zubin Potokut, ku janë gjetur mbetjet mortore të rreth dhjetëra shqiptarëve, viktima të regjimit të Sllobodan Millosheviqit.
Sipas Mujanoviqit, ky zbulim është një kujtesë se pasojat e luftërave të viteve ’90 dhe krimet e kryera nga regjimi i Beogradit mbeten ende kryesisht të paadresuara.
Ai thekson se mijëra persona vazhdojnë të figurojnë të zhdukur, ndërsa strukturat politike dhe normat e vendosura nga regjimi i Millosheviqit në rajon nuk janë reformuar.
Mujanoviq ka kritikuar edhe komunitetin ndërkombëtar, duke thënë se vazhdon të mbetet i përqendruar në përpjekje afatshkurtra, duke injoruar këto probleme të pazgjidhura.
“Zbulimi i dy varrezave të reja masive nga lufta e Kosovës, me dhjetëra viktima shqiptare të regjimit të Millosheviqit, është një kujtesë se sa të afërta janë ende këto krime dhe sa pak janë trajtuar pasojat rajonale të tyre”, ka shkruar Mujanoviq në X.
