Bernard Arnault dhe bashkëshortja e tij janë urdhëruar nga Gjykata Administrative e Apelit në Paris të paguajnë afro 22.5 milionë euro detyrime shtesë tatimore, pas një vendimi që lidhet me një mosmarrëveshje shumëvjeçare me autoritetet franceze.
Sipas vendimit, të cituar nga Agjencia Franceze e Lajmeve (AFP), çifti duhet të paguajë 12.96 milionë euro për vitin 2010, shumë që përfshin taksa, kontribute shoqërore, penalitete dhe interesa për vonesat në pagesë.
Përveç kësaj, Arnault është ngarkuar me një detyrim shtesë prej 9.5 milionë eurosh në kuadër të taksës franceze të solidaritetit për pasurinë, e cila mbulon periudhën 2012–2015.
Një zëdhënës i Arnault konfirmoi për AFP se vendimi do të kundërshtohet në Këshilli i Shtetit i Francës, duke bërë të ditur se beteja ligjore do të vazhdojë.
Në qendër të çështjes ndodhet struktura e pronësisë së aksioneve të LVMH, e cila sipas raportimeve të medias franceze L’Informé ka qenë objekt i një kontrolli të detajuar tatimor. Gjatë hetimeve, autoritetet franceze kanë kërkuar bashkëpunimin e autoriteteve në Luksemburg dhe Bahamas për të mbledhur informacion shtesë.
Bernard Arnault mbetet personi më i pasur në Francë dhe Evropë. Sipas renditjes së Bloomberg, ai aktualisht zë vendin e tetë në mesin e miliarderëve më të pasur në botë, me një pasuri të vlerësuar në rreth 165 miliardë dollarë.
