Vazhdimi i seancës konstituive të Kuvendit të Kosovës do të vazhdojë edhe sot. Sipas njoftimit të Kuvendit të Kosovës, në rend dite është zgjedhja e nënkryetarëve në sallën e seancave, prej orës 10:00.
Procesi i konstituimit të Kuvendit të Kosovës ka ngecur sërish, më 11 shtator, pasi deputetët nuk u dakorduan për mënyrën e votimit të pesë nënkryetarëve. Partia Demokratike e Kosovës dhe Lidhja Demokratike e Kosovës akuzuan partinë fituese të zgjedhjeve për bllokadë, teksa Lëvizja Vetëvendosje tha se nuk mund të votojë nënkryetarë që kundërshtojnë kandidatin për president të shtetit. Seanca u shty për të dielën e 13 shtatorit, sot.
Pas më shumë se një muaji bllokadë politike, Kuvendi i Kosovës ka bërë një hap drejt konstituimit të legjislaturës së 11-të. Të mërkurën, në vazhdimin e seancës konstituive është zgjedhur kryetarja e Kuvendit të Kosovës me 62 vota pro, ndërsa 16 deputetë votuan kundër kandidaturës së saj. Ndërkaq, pas dy ditës, më 11 shtator, deputeti i Lëvizjes Vetëvendosje, Ardian Gola, është zgjedhur nënkryetar i Kuvendit të Kosovës.Gola mori 101 vota për, asnjë kundër dhe një abstenim, duke siguruar kështu zgjedhjen në pozitën e dytë në parlamentin e shtetit.
Ndërkohë, Partia Demokratike e Kosovës kishte propozuar Vlora Çitakun për këtë pozitë. Megjithatë, Çitaku nuk arriti të zgjidhet në raundin e parë. Ajo mori 44 vota për, një kundër dhe 56 abstenime. Në shenjë pakënaqesie, deputetët kanë lëshuar sallën dhe kanë paralajmëruar se nuk do të kthehen më në sallë, por që do t’i drejtohen Gjykatës Kushtetuese për vonesat e konstitiuimit të Kuvendit të Kosovës.
Po atë ditë, në një tentativë tjetër në sallën e Kuvendit, deutetët e Lidhjes Demokratike të Kosovës (LDK) kanë lëshuar sallën e Kuvendit të Kosovës të premten, më 11 shtator , duke bërë që të dështojë përsëri seanca konstituive për zgjedhjet e nënkryetarëve. Arsyeja kryesore e vendimit erdhi pasi kryetarja e Kuvendit të tentoi të hidhte në votim individualisht propozimin e LDK-së për nënkryetarin e LDK-së, Kujtim Shalën, pa u zgjedhur paraprakisht nënkryetari nga radhët e partisë së dytë (PDK), shkruan KP.
Pas këtij veprimi të GP të LDK-së, kryetarja e Kuvendit, Albulena Haxhiu ka kërkuar që vazhdimi i seancës konstituive të mbahet më 13 shtator në orën 10:00.
Mbrëmë, Vetëvendosje, pas mbledhjes së kryesisë, ka bërë të ditur se kanë marrë vendim që nesër në seancën konstituive të Kuvendit, të votojnë kandidatët e PDK’së dhe LDK’së, Vlora Çitaku dhe Kujtim Shala, për nënkryetarë të Kuvendit.
The post Vazhdimi i seancës konstituive sot nga ora 10:00, ky është rendi i ditës appeared first on Gazeta Express.
