Kryetari i Sindikatës së Bashkuar të Arsimit, Shkencës dhe Kulturës (SBASHK), Rrahman Jasharaj, ka thënë se dialogu me Ministrinë e Arsimit dhe Shkencës ka filluar me ministrin Hajrullah Çeku, duke e vlerësuar ndryshe qasjen e tij krahasuar me ish-ministren Arbërie Nagavci.
Jasharaj ka thënë për Ekonomia Online se kërkesa e parë e SBASHK-ut, pavarësisht se kush do të jetë në krye të ministrisë, do të jetë vazhdimi i dialogut jo vetëm me sindikatën, por edhe me prindërit dhe drejtoritë komunale të arsimit.
“Po të them të vërtetën publikisht e kemi thënë se ditët më të këqija i kemi kaluar me zonjën Nagavci, ku ka munguar tërësisht dialogu. Për të mirë dallon shumë ministri tani zoti Hajrullah Çeku nga se me të kërkuar takimin e ka ofruar këtë mundësi dhe jemi takuar dhe qoftë në aktivitetet tona, qoftë në aktivitetet e MASHT-it, janë pesë herë që jemi takuar brenda një muaji, një muaji e pak më shumë. Domethënë dialogu ka filluar me ministrin Çeku”, tha ai.
Jasharaj ka thënë se SBASHK-u është i gatshëm të vazhdojë dialogun për aq kohë sa, sipas tij, edhe pala tjetër e dëshmon gatishmërinë për të njëjtin.
“Jemi për dhe do të vazhdojmë ne, sa pala tjetër sa shembujt të mirë do të na japë për dialog do të vazhdojmë me dialog e nëse kjo praktikë nuk vazhdohet ne do të kemi edhe mundësi tjera. Urojmë që zoti Çeku nëse do të jetë prapë ministër ta vazhdojë këtë mënyrë të dialogut me ne, sepse e ka pa edhe ai se ne jemi korrekt dhe e respektojmë shumë palën tjetër kur ajo është e prirë për dialog. Pra për momentin dialogu është në rradhë të parë për ne besoj edhe për ministrin Çeku dhe uroj që ky rikthim i nisur të mos përfundojë nga asnjëra palë”, tha ai.
Ai ka theksuar se dialogu do të jetë kërkesa e parë e SBASHK-ut, duke kërkuar që në këtë proces të përfshihen edhe prindërit dhe drejtoritë komunale të arsimit.
“Po që kërkesa e parë e SBASHK-ut pavarësisht urojmë mbase pse është treguar I saktë në dialog urojmë që të jetë ky minister, po nëse është edhe dikush tjetër hapi i parë që kërkesa jonë e parë gjithmonë ka qenë dhe do të jetë që ka dialog, që të ulemi të bisedojmë por jo vetëm me neve por edhe me prindërit edhe me DKA-të sepse kur jemi të gjithë bashkë edhe problemet do t’i qesim në tavolinë dhe bashkarisht në një front mund t’i realizojmë më lehtë dhe mund ta bëjmë arsimin shumë më të mirë nga kjo që është tani, por kërkesa e parë do të jetë dialogu”, tha ai.
Jasharaj ka bërë të ditur se SBASHK-u është zotuar për bashkëpunim me Këshillin e Prindërve, Këshillin e Nxënësve, Këshillin e Studentëve, drejtoritë arsimore dhe Kolegjin e Rektorëve për realizimin e planit strategjik për arsimin deri në vitin 2030.
“Ne jemi zotuar bashkë me Këshillin e Prindërve, bashkë me Këshillin e Nxënësve, Këshillin e Studentëve, me drejtoritë arsimore dhe me kolegjin e e rektorëve se do të ndihmojmë, do të punojmë bashkë në realizimin e planit strategjik për arsimin 2030 plus, sepse mendojmë se Kosova duhet ta ketë të vetin një plan strategjik e jo të kopjuar nga shtetet shumë të zhvilluara”, tha ai.
Ndërkaq, si kërkesë të dytë të SBASHK-ut, Jasharaj ka përmendur kontratën kolektive të arsimit dhe punën e dy komisioneve.
“Ndërsa kërkesa jonë e dytë duke u bazuar në zërin e anëtarësisë do të jetë puna në kontratë kolektive, puna e dy komisioneve dhe nënshkrimi i kontratës së re kolektive të arsimit”, tha ai.
The post Jasharaj: Ditët më të këqija i kaluam me Nagavcin, me Çekun dialogu ka nisur appeared first on Gazeta Express.
