Presidenti Donald Trump vendosi një kusht të ri për bisedimet me Iranin, duke thënë se tani do të kërkojë kompensim nga ky vend për dëmet e shkaktuara në të kaluarën, pasi Teherani gjatë fundjavës deklaroi se SHBA-ja duhet të paguajë kompensim në mënyrë që të rihapet Ngushtica e Hormuzit.
Kjo përplasje mes dy palëve sugjeron se SHBA-ja dhe Irani nuk janë më pranë arritjes së një marrëveshjeje që do të mundësonte rihapjen e Ngushticës së Hormuzit. Përkundrazi, kërkesat e reja duket se kanë zbehur gjasat për një marrëveshje të shpejtë, pavarësisht optimizmit të javës së kaluar se një marrëveshje ishte pranë.
“Shoh se përfaqësuesit e Republikës Islamike të Iranit po kërkojnë kompensim për dëmet e shkaktuara ndaj tyre gjatë pesë muajve të fundit të konfliktit ushtarak (i nisur sepse ATA NUK DO TË KENË ARMË BËRTHAMORE), edhe pse kjo nuk është përmendur kurrë në asnjë nga negociatat apo takimet tona!”, shkroi Trump të hënën në rrjetet sociale.
“Por është një ide interesante”, vijoi ai, “sepse tani edhe unë po kërkoj kompensim nga Irani për të gjithë njerëzit që ata kanë vrarë dhe plagosur rëndë me bombat e vendosura në rrugë dhe në konfliktet e shumta, për të cilat janë të njohur”.
Presidenti tha se kompensimet duhet t’u paguhen gjithashtu “familjeve të qindra mijëra protestuesve të pafajshëm që Irani ka vrarë gjatë 50 viteve të fundit, për të mos përmendur 52 mijë personat që janë vrarë gjatë pesë muajve të fundit”.
“U kam udhëzuar përfaqësuesve të mi që ta përfshijnë këtë në mënyrë të prerë në çdo negociatë të ardhshme”, përfundoi ai.
Gjatë fundjavës, Mohammad Bagher Zolghadr, një figurë me ndikim të madh në Gardën Revolucionare të Iranit, paraqiti një sërë kërkesash maksimaliste për rihapjen e ngushticës. Këto përfshinin kompensim nga SHBA-ja për dëmet e shkaktuara gjatë luftës së këtij viti, si dhe gjatë konfliktit të qershorit 2025, i cili u zhvillua kryesisht nga Izraeli.
The post Trump vendos kusht të ri për negociatat me Iranin: Teherani të paguajë kompensim për dëmet e shkaktuara appeared first on Gazeta Express.
