Të paktën 132 persona kanë vdekur dhe mbi 480 të tjerë janë plagosur pas një tërmeti të fuqishëm që goditi Kolumbinë. Pas tërmetit është shpallur gjendje e jashtëzakonshme, ndërsa autoritetet paralajmërojnë se numri i viktimave mund të rritet, pasi dyshohet se ka persona të bllokuar nën rrënoja.
Tërmeti me magnitudë 7.4 goditi në orën 07:34 sipas kohës lokale, me epiqendër në afërsi të fshatit San José del Palmar, në provincën Chocó. Sipas Shërbimit Gjeologjik të Kolumbisë, tërmeti kishte një thellësi prej rreth 103 kilometrash.
Lëkundjet u ndjenë në një zonë shumë të gjerë, në qindra kilometra përgjatë pjesës perëndimore të Kolumbisë.
Një nga zonat më të prekura është qyteti Pereira, në rajonin e njohur për prodhimin e kafesë. Autoritetet lokale kanë raportuar të paktën 40 viktima në zonën metropolitane të qytetit, ndërsa 65 ndërtesa janë shembur. Në 15 prej tyre dyshohet se mund të ketë ende persona të bllokuar.
Pamjet e verifikuara tregojnë shembjen e të paktën një ndërtese në Plaza Bolívar, sheshin kryesor të Pereira-s. Në shesh janë shpërndarë mbetje ndërtimore dhe pluhur, ndërsa ekipet e emergjencës po vazhdojnë kërkimet për të mbijetuar.
Në disa pjesë të qytetit është vendosur shtetrrethim deri në orën 05:00 të mëngjesit të së martës.
Edhe qyteti Cali, rreth 160 kilometra në jug të Pereira-s, është goditur rëndë. Sipas autoriteteve, 32 ndërtesa janë shembur.
Një turist britanik, Dan Cutler, i cili ndodhet në Cali prej rreth dy muajsh, tregoi për BBC-në se ishte zgjuar nga lëkundjet e fuqishme.
“Kam përjetuar diçka të tillë për herë të parë”, tha ai, duke treguar se ai dhe partnerja e tij dolën me vrap nga hoteli. Sipas tij, ndërtesa nuk pësoi dëme të mëdha strukturore, por në mure u shfaqën çarje dhe u shkëputën pjesë të bojës dhe suvasë.
Epiqendra e tërmetit ishte pranë San José del Palmarit, por kryetari i kësaj zone, León Fabio Marín Moncada, tha se, pavarësisht dëmeve në rrugët që lidhin fshatin me pjesën tjetër të vendit, nuk janë raportuar viktima apo të plagosur atje.
Viktima janë raportuar edhe në Manizales, Quibdó dhe Medellín, si dhe në rajonet Chocó dhe Valle del Cauca.
Në Manizales janë konfirmuar të paktën dy viktima. Një grua që ndodhej në një hotel në qytet tregoi se gjatë tërmetit muret filluan të çaheshin.
“Vërejta pluhur që dilte nga ndërtesat përreth dhe tulla që binin nga muret”, tha ajo për BBC World Service.
Autoritetet dhe ekipet e shpëtimit po vazhdojnë kërkimet në ndërtesat e shembura, ndërsa pritet që bilanci i viktimave dhe dëmeve materiale të ndryshojë gjatë orëve në vijim.
