Komanda Qendrore e ushtrisë amerikane (CENTCOM), ka njoftuar se forcat amerikane kanë nisur sulme të reja ndaj Iranit.
Në një deklaratë të publikuar në rrjetet sociale, CENTCOM tha se operacioni është urdhëruar nga presidenti amerikan dhe synon të dobësojë aftësinë e Iranit për të kërcënuar lirinë e lundrimit në Ngushticën e Hormuzit.
“SHBA-ja po e mban Iranin përgjegjës për agresionin e fundit të pajustifikuar ndaj anijeve tregtare dhe ekuipazheve civile që lundrojnë lirshëm në një rrugë ujore jetike ndërkombëtare”, thuhet në deklaratë.
Ndërkohë, mediat iraniane kanë raportuar për shpërthime në disa zona në jug të Iranit pas sulmeve amerikane, raporton BBC.
Agjencia shtetërore e lajmeve IRNA raportoi se janë dëgjuar disa shpërthime në qytetet Konarak dhe Çabahar, ndërsa në disa pjesë të Çabaharit është ndërprerë energjia elektrike.
Televizioni shtetëror iranian IRIB njoftoi gjithashtu se sistemet e mbrojtjes ajrore janë aktivizuar në Bandar Abbas dhe se janë raportuar shpërthime në këtë zonë.
Sulmet e reja vijnë në një periudhë tensionesh të larta mes Uashingtonit dhe Teheranit, pas përplasjeve të fundit lidhur me sigurinë e transportit detar në Ngushticën e Hormuzit.
Trump paralajmëron sulme të reja ndaj Iranit, thotë se armëpushimi “ka përfunduar”
