Prokuroria Themelore në Mitrovicë – Departamenti i Krimeve të Rënda ka ngritur aktakuzë ndaj V.M., në Gjykatën Themelore në Mitrovicë, nën dyshimin se ka kryer veprat penale “Vrasja e rëndë në tentativë” dhe “Mbajtja në pronësi, kontroll ose posedim të paautorizuar të armëve”.
Sipas aktakuzës, V.M. dyshohet se, nga një periudhë e pacaktuar deri më 1 nëntor 2025, ka ndihmuar persona të tjerë në realizimin e veprës penale.
Rasti lidhet me rrëmbimin e Vukashinoviqit, i cili më 1 nëntor 2025 dyshohet se u plagos dhe u rrëmbye në fshatin Jellakcë, afër Leposaviqit, para se të dërgohej në territorin e Serbisë, fillimisht në spitalin e Prokuples e më pas në Qendrën Klinike të Nishit.
Prokuroria pretendon se gjatë paradites së 1 nëntorit 2025, i pandehuri ka fotografuar automjetin e të dëmtuarit M.V., i cili ndodhej pranë shtëpisë së tij, dhe fotografitë ia ka dërguar A.F.-së.
Më pas, M.V. është kontaktuar dhe, sipas aktakuzës, është dakorduar të shkonte në një lokacion në fshatin Kapuricë të Komunës së Leposaviqit, me arsyetimin se do të blinte mjaltë.
Sipas Prokurorisë, pasi i dëmtuari ishte nisur me automjetin “Niva”, V.M. e ka njoftuar përmes telefonit A.F.-në se ai ishte nisur në drejtim të kufirit. Kur M.V. ka arritur në lokacionin e caktuar, persona të panjohur dyshohet se e kanë plagosur dhe rrëmbyer, duke e dërguar më pas në territorin e Serbisë.
Në kuadër të së njëjtës çështje, Prokuroria pretendon se V.M. në shtëpinë e tij në fshatin Leshak ka mbajtur pa autorizim armë dhe municion. Gjatë kontrollit, sipas njoftimit, janë sekuestruar një armë gjuetie me dy tyta, një tytë e armës së gjatë, një jelek gjuetie me 28 fishekë të armës së gjatë dhe 11 fishekë të tjerë.
Prokuroria Themelore në Mitrovicë i ka kërkuar gjykatës që V.M. të shpallet fajtor për veprat penale për të cilat akuzohet dhe të dënohet sipas ligjit.
The post Rrëmbimi i Vukashinoviqit, ngrihet aktakuzë ndaj personit që dyshohet se ndihmoi në organizimin e rastit appeared first on Gazeta Express.
