Pas vjeljes së boronicës, mjedrës dhe manaferrës në pemishtën prej rreth 7 hektarësh, Xhavit Din Aliaj nga Hereqi i Gjakovës këto ditë ka filluar vjeljen e aronisë. Ai është shprehur jashtëzakonisht i kënaqur me prodhimin e saj, sivjet.
“Këtë vit bereqetet t’i quaj ashtu apo rendimentet e kulturave apo pemëve manore janë jashtëzakonisht të mira që i tejkalojnë të gjitha pritjet e mia si fermer por edhe si ekspert i bujqësisë. Duke i parë rendimentet në plantacion besoj që stimulojmë edhe fermerët tjerë që merren me këtë veprimtari jo aq të zorshme sa fitimprurëse”, tha Xhavit Aliaj.
Krahas punëtorëve sezonalë që janë angazhuar në pemishten e aronisë, Xhavitin po e ndihmon pa përtesë edhe nipi i tij i cili së bashku me familje po i kalon pushimet në vendlindje.
“Unë kam ardhur në Kosovë me i ndihmu gjyshit me vjelë aronia edhe boronica”, tha Arbër Alija.
Punën e vyer të fermerit Aliaj po e vlerësojnë edhe zyrtarët për bujqësi në Komunën e Gjakovës.
“Njerëz me këtë vullnet të punës si Xhaviti i duhen komunës sonë me pas sa më shumë. Fermerët tashmë kanë kaluar në mbjelljen e boronicës, mjedrës, në mbjelljen e prodhimeve që janë profitabile për ne, por edhe si konsumatorë të këtyre produkteve”, tha Gani Hajdari, drejtor i DBZHR-së.
Si rezultat i punës dhe prodhimeve cilësore pemëtari Aliaj nga institucionet shtetërore është licensuar edhe për përpunimin e lëngut të aronisë, prodhim ky poashtu mjaft i kërkuar në tregun vendor./rtk
