Partia Demokratike e Kosovës ka reaguar lidhur me situatën politike në vend, duke argumentuar se po shkelen afatet kushtetuese dhe rregullat për zhvillimin e seancës konstituive të Kuvendit.
PDK-ja ka paraqitur tri pika që, sipas saj, sqarojnë situatën rreth konstituimit të Kuvendit.
Në një postim në Facebook, PDK i është referuar nenit 66 të Kushtetutës, duke theksuar se Kuvendi duhet të zgjidhet me mandat katërvjeçar dhe se seanca konstituive duhet të mbahet brenda 30 ditësh nga dita e shpalljes zyrtare të rezultateve të zgjedhjeve.
Për ta sqaruar thjesht për qytetarët se çfarë po ndodh me Kuvendin: 1. Kushtetuta përcakton se Kuvendi duhet të konstituohet brenda 30 ditësh nga certifikimi i rezultateve të zgjedhjeve. 2. Gjykata Kushtetuese e ka bërë edhe më të qartë: 30 ditët nuk janë vetëm afat për ta nisur procesin. Brenda këtij afati Kuvendi duhet të konstituohet. 3. Rregullorja e Kuvendit përcakton se, derisa të përfundojë seanca konstituive me zgjedhjen e Kryetarit dhe nënkryetarëve, ndërprerjet nuk mund të zgjasin më shumë se 48 orë”, thuhet në postim.
Partia ka përmendur edhe Aktgjykimin KO124/25 të Gjykatës Kushtetuese, duke theksuar se, sipas interpretimit të Gjykatës, afati 30-ditor nuk është vetëm afat për fillimin e procedurës, por brenda këtij afati duhet të konstituohet Kuvendi.
“Afati 30-ditor ka kaluar pa u konstituuar Kuvendi. Tash po shpërfillet edhe rregulli 48-orësh. Kushtetuta nuk është rekomandim. Aktgjykimet nuk janë opsionale. Rregullat vlejnë për të gjithë – edhe për pushtetin. Ajo që po ndodh është suspendim dhe goditje e drejtpërdrejtë ndaj rendit kushtetues të Republikës. PDK do ta mbrojë rendin kushtetues me çdo mjet!”, thuhet në postim.
Me kërkesë të kryeministrit në detyrë, kryetarit të LVV-së, Albin Kurti, seanca konstituive e Kuvendit që nisi më 6 korrik u ndërpre dy herë radhazi. Ai nuk e ka propozuar kandidatin për kryeparlamentar, siç kërkohet me Kushtetutë, pasi e konsideron të padobishme që të zgjidhet kryeparlamentari dhe nënkryetarët pa një marrëveshje paraprake për zgjedhjen e Presidentit.
Sipas një aktgjykimi të Gjykatës Kushtetuese, të premtën në mesnatë ka përfunduar afati për konstituimin e Kuvendit. Megjithatë, kryesuesi i seancës, Avni Dehari, deputeti më i vjetër i Kuvendit që vjen nga LVV-ja, e caktoi për të shtunën vazhdimin e seancës konstituive, e cila u ndërpre nga ai në po të njëjtën mënyrë si ditën kur ajo nisi.
The post PDK citon Kushtetutën: Afati 30-ditor për konstituimin e Kuvendit ka kaluar, po shpërfillet rregulli 48-orësh appeared first on Gazeta Express.
