Ishte vendosur para katër vjetësh, me qëllim të solidarizimit me popullin ukrainas gjatë luftës.
Por, i njëjti flamur tashmë nuk shihet më në sheshin “Zahir Pajaziti” në Prishtinë.
Ishte pikërisht deklarata e Zelenskyt në një konferencë për media krah Vuçiqit, ku theksoi se qëndrimi i Ukrainës për mosnjohjen e Pavarësisë së Kosovës nuk ka ndryshuar ajo që nxiti reagime në Prishtinë.
Këtë përgjigje, Zelensky e dha gjatë vizitës së tij dyditore në Serbi.
Por, pas kësaj deklarate, nuk kaloi shumë kohë dhe kryetari i Prishtinës, përmes rrjeteve sociale, njoftoi se flamuri i Ukrainës po largohej nga sheshi me arsyetimin se shteti i Kosovës duhet të respektohet. Kur Kosova nuk respektohet, kryeqyteti përgjigjet!”
“Empatia dhe solidariteti ynë do të jenë gjithmonë me popujt që përballen me luftë, dhunë e persekutim. Sepse ne, më mirë se shumë të tjerë, e dimë çfarë do të thotë të luftosh për liri, dinjitet dhe të drejtën për të ekzistuar si shtet”,ishte reagimi i Ramës.
Tutje, ai theksoi se asnjë kauzë dhe asnjë politikë nuk mund të ndërtohet duke nënçmuar shtetësinë e Kosovës dhe sakrificën e popullit të saj.
Pas largimit disa qytetar besojnë qe u veprua drejt me flamurin ukrainas.
“Sipas deklaratës së tij, kemi pasur të drejtë. Ne, me të gjitha mundësitë që kemi pasur, jemi munduar t’i ndihmojmë”, tha një qytetar.
“Edhe ata le t’i thërrasin mendjes, le ta shohin. Nëse ai s’na njeh, haptas thotë që nuk na njeh dhe nuk e ka ndërmend, pse edhe ne ta përkrahim”, u shpreh Mirsad Krasniqi.
Për largimin e flamurit, avokati Arianit Koci thotë se fillimisht duhet të dihet mbi cilat kritere ishte vendosur ai flamur.
“Nuk është problem ta cekim se nuk është problem që sot është larguar flamuri. Ajo që është problem është pse është vendosur flamuri para katër vitesh, kush e ka vendosur dhe mbi cilat kritere. A janë koordinuar Qeveria me Komunën dhe Ministrinë e Punëve të Jashtme, sepse politika e jashtme është një interes shtetëror”, tha ai.
Tutje, Koci theksoi se, sipas tij, Ukraina nuk e ka ndryshuar qëndrimin ndaj Kosovës, pasi nuk kishte pasur plane për ta njohur Kosovën as para agresionit rus.
“Në momentin kur ne e kemi vendosur flamurin para katër vitesh, le të themi se jemi solidarizuar, por ata nuk na kanë pranuar as atëherë dhe as tani. Ajo që është më interesante është se Zelensky nuk ka ndryshuar ndonjë qëndrim dhe nuk ka thënë se në të ardhmen e afërt do ta njohë Kosovën”, u shpreh ai.
Ndërsa, nga Komuna e Prishtinës, përveç reagimit të kryetarit në rrjetet sociale, TëVë1 nuk mori ndonjë përgjigje lidhur me rastin.
