Nga viti 2014, është në krye të Sindikatës së Bashkuar të Arsimit.
Kështu për 12 vjet me radhë, Rrahman Jashari, u bë zëri i mësueseve në Kosovë.
Por, në dhjetor të këtij viti, Jashari pritet ta dorëzojë mandatin e kryesindikalistit.
Shkak për këtë, është ditëlindja e 65-të, që shënon edhe daljen në pension.
Në një intervistë për Tëvë1, Jashari ka rrëfyer momentet të cilat ai nuk do të harrojë asnjëherë .
“Kur e kishim grevën maratonike prej pesë javësh, le që kishim përplasje e biseda nga larg me Qeverinë e cila u kthye në një qeveri e cila i sulmonte SBASHK-un sidomos. Por ajo çka ishte më e keqe ishte kritika pa vend e pa arsye qe i bënin një pjesë goxha e madhe në facebook, me ofendime nga më të ndryshme jo vetëm për mua por edhe për kolegët e mi. Sidomos pas grevës kemi pas momente të rënda”, ka deklaruar kryetari i SBASHK-ut, Rrahman Jashari.
Për shkak të këtyre grevave që u mbajtën në shtatorin e 2022 ai mori ofendime të shumta.
Mirëpo kryetari i SBASHK tregon se cili moment gjatë punës, e preku më së shumti në jetë.
“Momenti që nuk e kam fshehur kurrë është momenti i gënjeshtrës të cilën u mundua të shpalos në media njëri nga udhëheqësit e Vetëvendosjes që ishte Elvis Hoxha i cili u mundua të gënjejë dhe të bartë në një parti që ishte me zërin më të keq në vitet e 90, ishte fjala në partinë e kryekriminelit të Ballkanit, Milloshevic”, tha tutje Jashari.
Njeriu i cili organizoi shumë greva për të drejtat e mësimdhënësve, ka një porosi për këdo që merr drejtimin e kësaj Sindikate.
“Ai apo Ajo që merr këtë pozitë duhet të dijë që ka sfida të shumta duhet të dinë që në SBASHK ka probleme. Kur janë punët mirë, trokimat në derën tonë janë bukur të rralla edhe telefonatat janë më të shpeshta kur paraqiten problemet , i uroj atij që vjen në vendit tim që të vazhdojë dhe e ka të lehtë të vazhdojë meqenëse e ka një rrugë që e kemi trasuar , uroj që ta ruaj besimin e ndërsjellë dhe unitetin”, ka përfunduar Jashari.
Ndryshe, në dhjetor pritet të mbahet edhe mbledhja e Këshillit të Përgjithshëm të SBASHK-ut ku pritet të emërtohet kryetari i ri.
The post Pas 12 vitesh në krye të SBASHK-ut, Rrahman Jasharaj pritet të pensionohet në dhjetor appeared first on Gazeta Express.
