Ish-kryeministri britanik, Keir Starmer, ka njoftuar të martën (01.09.2026) se do të tërhiqet si deputet për t’u përqendruar në një rol tjetër në çështje ndërkombëtare, raporton BBC.
“Gjithashtu do të vazhdoj, siç kam bërë për një kohë të gjatë me të tjerët, të punoj në luftën kundër dhunës ndaj grave dhe vajzave; kjo është një çështje që ka shumë rëndësi për mua” – ka thënë ai.
Dorëheqja do të shkaktojë zgjedhje të pjesshme në zonën zgjedhore Holborn dhe Shën Pancras në Londër, bastion i kahershëm i Partisë Laburiste, të cilën e ka përfaqësuar që nga viti 2015.
Starmer , i cili u largua nga “Downing Street” në korrik, kishte thënë më parë se do të mbetej në detyrën e deputetit deri në zgjedhjet e ardhshme të përgjithshme në Mbretërinë e Bashkuar, të cilat nuk parashihen deri më 2029.
Por në një deklaratë të befasishme disa orë para se pasardhësi i tij, Andy Burnham, të debutonte në Dhomën e Komunave, ai ka treguar se po jep dorëheqjen për t’u marrë me çështje të tilla, si çështjet ndërkombëtare dhe dhuna ndaj grave e vajzave.
Teksa ka kumtuar dorëheqjen e tij, ai i ka deklaruar “Camden New Journal”-it se ishte “nder dhe privilegj i madh” që e përfaqësoi zonën zgjedhore të Londrës për 11 vjet me radhë, duke u dhënë fund disa javëve me spekulime nëse do të vazhdonte punën me mandatin e deputetit.
Ai ka shtuar se është i gatshëm “t’ia kalojë stafetën një pasardhësi”, duke i thënë gazetës se ka ardhur “koha e duhur” që të largohet nga Parlamenti.
“Tani do të përqendrohem në gjëra të tjera dhe këto do të jenë çështjet ndërkombëtare, duke përfshirë mbrojtjen, sigurinë, tregtinë dhe teknologjinë në një botë që ndryshon me shpejtësi” – ka deklaruar ai.
The post Starmer do ta dorëzojë mandatin e deputetit appeared first on Gazeta Express.
