Studiuesi i filozofisë politike, Latif Mustafa, ka vlerësuar se Lëvizja Vetëvendosje (LVV), si partia fituese e zgjedhjeve të 7 qershorit, nuk duket ende e gatshme për të qeverisur në koalicion.
Në emisionin “Këndi i Debatit” në Tëvë1, Mustafa ka thënë se kryeministri në detyrë dhe njëherësh kryetar i LVV-së, Albin Kurti, ndihet komod në situatën aktuale, pasi beson se edhe në rast të zgjedhjeve të reja mund të arrijë afërsisht të njëjtin rezultat.
Sipas tij, një nga faktorët që e bën të paqartë zhvillimin e situatës politike është qëndrimi i Lidhjes Demokratike të Kosovës (LDK) ndaj një bashkëpunimi të mundshëm me LVV-në.
“Një faktor që e bën të paqartë këtë ekuacion politik është LDK-ja. A është e gatshme ajo të pranojë gjithçka që ofron Lëvizja Vetëvendosje? Por edhe LVV-ja, siç duket, nuk është ende e gatshme për koalicion, sepse nuk e di se si është të qeverisësh në koalicion. Për momentin topi është te opozita. Albin Kurti e ndjen komoditetin dhe mendon se, në rastin më të keq, vendi mund të shkojë sërish në zgjedhje dhe ai mund të marrë përafërsisht të njëjtin rezultat”, ka deklaruar Mustafa.
Ai ka shtuar se opozita, në anën tjetër, vlerëson se zgjedhjet e reja do të sillnin pjesëmarrje edhe më të ulët të qytetarëve dhe do ta dëmtonin legjitimitetin politik e demokratik të institucioneve.
Sipas Mustafës, një strategji e tillë mund të konsiderohet e pranueshme nga aspekti politik, por jo nga ai i shtetformimit.
“Opozita presupozon se, nëse e dërgojmë vendin edhe një herë në zgjedhje, dalja e qytetarëve do të jetë edhe më e vogël, legjitimiteti politik dhe demokratik do të zbehet edhe më shumë, ndërsa kjo do ta dëmtojë partinë më të madhe, siç e kemi parë edhe herën e fundit. Politikisht kjo mund të pranohet si strategji, por në aspektin e shtetformimit është e papranueshme dhe përbën një lloj mendjelehtësie e naiviteti politik”, ka përfunduar ai./teve1.info/
