Deputetja e Partisë Demokratike të Kosovës (PDK), Ganimete Musliu, ka deklaruar se pas 16 shtatorit pozita e Republikës së Kosovës nuk do të jetë e njëjtë, as brenda dhe as jashtë kufijve të saj, në kontekstin shtetëror dhe historik.
Musliu ka kritikuar moskonstituimin e Kuvendit dhe vonesat në formimin e institucioneve të vendit.
Ajo ka thënë se 16 shtatori nuk do të duhej ta gjente Kosovën pa institucione, të paktën pa Kuvend të konstituuar.
“Moskonstituimi i Kuvendit dhe institucioneve të tjera të vendit është papërgjegjësi dhe neglizhencë e jashtëzakonshme e Albin Kurtit karshi vendimit që do të merret më 16 shtator në Hagë. Pas datës 16 shtator, pozicioni i Republikës së Kosovës nuk do të jetë i njëjtë, as brenda dhe as jashtë kufijve të saj, në kontekstin shtetëror dhe historik.Prandaj, 16 shtatori nuk është dashur, në asnjë rrethanë dhe në asnjë formë, të na gjejë pa institucione, minimalisht pa Kuvend. Nëse kjo ndodh, pra që 16 shtatori të na gjejë pa institucione ose pa konstituim të Kuvendit, këtë nuk do të na e falë historia. Historia do ta mbajë përgjegjëse këtë legjislaturë. Kjo nuk po bëhet pa qëllim dhe është e pafalshme dhe e patolerueshme”, ka deklaruar Musliu.
Sipas saj, moskonstituimi i Kuvendit dhe institucioneve të tjera të vendit përbën papërgjegjësi dhe neglizhencë të jashtëzakonshme nga kryeministri në detyrë, Albin Kurti, veçanërisht në prag të vendimit që pritet të merret më 16 shtator në Hagë.
Musliu ka theksuar se pret që vendimi i Gjykatës të jetë i drejtë dhe ka shprehur shpresën që ai të jetë shfajësues për të akuzuarit, në mënyrë që ata të lirohen dhe të kthehen në Kosovë.
Ajo ka paralajmëruar gjithashtu se një vendim i kundërt, sipas saj, mund të ketë pasoja zinxhirore jo vetëm për Kosovën, por edhe për institucione të tjera që kanë qenë të përfshira në rrugëtimin e Ushtrisë Çlirimtare të Kosovës drejt lirisë dhe pavarësisë.
“Ne lutemi që ai vendim të jetë i drejtë. Nëse do të jetë një vendim i drejtë, pa asnjë dyshim, duhet të jetë vendim shfajësues dhe ata duhet të lirohen e të kthehen të lirë në Kosovë. Çdo vendim ndryshe, sipas meje, nuk mund të konsiderohet drejtësi. Nëse merret një vendim i tillë, pasojat do të jenë zinxhirore, jo vetëm për Kosovën, por edhe për institucionet e tjera që kanë qenë të implikuara në rrugëtimin e UÇK-së drejt lirisë dhe pavarësisë”, ka përfunduar ajo.
Ndryshe, aktgjykimi për katër të akuzuarit për krime lufte, Hashim Thaçi, Kadri Veseli, Jakup Krasniqi dhe Rexhep Selimi, do të shpallet më 16 shtator të këtij viti.
Katër ish-udhëheqësit e Ushtrisë Çlirimtare të Kosovës, Thaçi, Veseli, Krasniqi dhe Selimi, të cilët mbahen në paraburgim në Hagë që nga nëntori i vitit 2020, akuzohen nga Prokuroria Speciale për krime lufte dhe krime kundër njerëzimit për veprat penale: vrasje, torturim dhe përndjekje të kryera gjatë luftës në Kosovë të vitit 1998-99.
Që të katërt, Thaçi, Veseli, Krasniqi dhe Selimi, i kanë mohuar akuzat e Prokurorisë, ndërsa mbrojtja e të akuzuarve ka argumentuar se ata duhet të shpallen të pafajshëm.
Trupi Gjykues, më 18 dhjetor të vitit 2025, mbylli fazën e paraqitjes së provave.
Në këtë proces gjyqësor kanë dhënë dëshmi 134 dëshmitarë, 125 të thirrur nga Prokuroria, dy të thirrur nga Mbrojtja e Viktimavedhe shtatë dëshmitarë të thirrur nga ekipet e Mbrojtjes.
The post Musliu: Pas 16 shtatorit, pozita e Republikës së Kosovës s’do të jetë e njëjtë appeared first on Gazeta Express.
