Një histori e ndodhur, e faktuar dhe e dokumentuar i në Galerinë e Arteve të Prishtinës, vazhdon të jetë e hapur ekspozita “Ditari i një fotografi të luftës” e fotografit Visar Kryeziu, me kuratore Eliza Hoxhën, në kuadër të aktiviteteve të platformës qytetare “Liria Ka Emër” dhe në prag të Marshit për Liri të 12 shtatorit, shkruan Gazeta Metro.
Ekspozita sjell një përzgjedhje nga arkivi fotografik i Kryeziut, të realizuar gjatë luftës në Kosovë më 1998-1999 dhe në periudhën menjëherë pas saj, duke rikthyer përmes fotografisë pamje, dëshmi dhe momente të një prej periudhave më të rëndësishme të historisë së Kosovës.
Fotografitë e ekspozuara dokumentojnë luftën, vuajtjet e popullatës, rezistencën, çlirimin dhe gjurmët që lufta la pas, duke e shndërruar ekspozitën në një dëshmi vizuale të kujtesës sonë kolektive.
Lidhur me ekspozitën disa fjalë për Metro i tha vetë autori, i cili konsideron moment ideal për t’a treguar të vërtetën.
“Kemi mendu që kjo është koha e fundit që duhet me i dhanë të vërtetën, me ia tregu të vërtetën botës”, tha Visari.
Fotografia dëshmon. Kujtesa mbetet. Historia nuk zhbëhet. Këtë e dëshmon më së miri dhe vetë ekspozita e Visarit.
The post ‘Koha e fundit me ia tregu botës të vërtetën’: Autori Kryeziu shpalos ditarin me fotografi lufte appeared first on Gazeta Express.
