Rusët po dërgojnë në misione luftarake në vijën e frontit edhe ata pushtues që kanë rezultuar pozitivë me HIV.

Kjo bëhet e ditur përmes një regjistrimi audio të një bisede, të publikuar në kanalin YouTube të Drejtorisë Kryesore të Inteligjencës së Ministrisë së Mbrojtjes së Ukrainës (DIU), sipas agjencisë Ukrinform, përcjell Telegrafi.

Sipas mediumit në fjalë, vihet re se specialistët e inteligjencës ushtarake përgjuan një bisedë mes një ushtari të Brigadës së 1-rë të Veçantë të Pushkëtarëve të Motorizuar të Ushtrisë Ruse, e cila vepron në drejtimin e Pokrovskut.

“Pushtuesi është i infektuar me HIV, gjendje që, pa mjekimin e duhur, çon në komplikacione. Për më tepër, që në muajin shkurt, një komision mjekësor e kishte shpallur atë të papërshtatshëm për shërbim, por kjo nuk e pengoi dërgimin e tij në misione luftarake”, raportoi DIU.

Agjencia vuri në dukje se ky ushtar rus ishte shpallur madje edhe dezertor.

Ajo deklaroi se degradimi i ushtrisë pushtuese vazhdon: makineria ushtarake e Rusisë po rekruton si trupa sulmuese persona të papërshtatshëm për shërbim dhe po kontribuon në përhapjen e HIV/AIDS-it.

Në këtë drejtim, Drejtoria Kryesore e Inteligjencës siguroi se do të ketë ndëshkim të drejtë për çdo krim lufte të kryer kundër Ukrainës.

Agjencia përsëriti se e vetmja mundësi që një ushtar rus të shpëtojë jetën dhe të shmangë kontraktimin e një sëmundjeje të pashërueshme është të dorëzohet përmes bot-it në Telegram të projektit “Dua të Jetoj” (I Want to Live).

Siç është raportuar më parë, Drejtoria Kryesore e Inteligjencës së Ministrisë së Mbrojtjes identifikoi mercenarin rus të vrarë si një shtetas me origjinë nga Sierra Leone. /Telegrafi/