Kryeministri në detyrë, Albin Kurti, tha se në takimin e sotëm me kreun e LDK’së, Lumir Abdixhiku, do të shkojë “me vullnet të mirë”.
Ai s’iu përgjigj direkt pyetjeve të gazetarëve se me çfarë propozimi do të hyjë në takim, por tha se “hollësitë” do të vijnë pas takimeve.
“Në formatin një plus një do të jetë edhe Lidhja Demokratike e Kosovës, kryetari Lumir Abdixhiku me bashkëpunëtorë dhe ne dëshirojmë që sa më parë të konstituohet Kuvendi, të zgjidhet Qeveria dhe ta zgjedhim Presidentin, meqenëse siç kemi thënë më herët, siç nuk kemi pasur nevojë për zgjedhjet e kaluara, nuk kemi nevojë as që ato të ardhshme të jenë para vitit 2030. Pra, kemi nevojë për cikle të rregullta zgjedhore, ku çdo katër vjet një qeveri qeveris dhe më pastaj vlerësohet tek populli si burim i sovranitetit, i cili na bën përgjegjës e llogaridhënës në Republikën tonë demokratike e parlamentare. Unë shkoj me vullnet të mirë, shkoj me gatishmëri për marrëveshje dhe natyrisht që hollësitë e diskutimeve do të mund të vijnë në shprehje vetëm pas takimeve dhe pas marrëveshjeve, përkatësisht pas suksesit për të cilin urojmë sepse punojmë”, tha ai.
Ndërkaq, Kurti, duke deklaruar se e ka “në synim” që ta bëjë konstituimin e institucioneve, u ankua për dy partitë tjera që i refuzuan ftesat e tij, PDK e AAK.
“Fatkeqësisht, dy partitë e tjera nuk e konsideruan të nevojshme apo të arsyeshme që të takohemi. Unë mendoj ndryshe. Përderisa me AAK-në nuk jemi takuar fare, besoj që ka pasur shumë nevojë që të takohemi përsëri me kryetarin e PDK-së. Tash, unë do të shkoj atje me ministrin e Financave, që njëkohësisht është anëtar i Kryesisë së Vetëvendosjes, Hekuran Muratin”./Express/
The post Kurti: Kemi pasur nevojë për takim me Kryetarin e PDK’së, në takimin me Abdixhikun shkoj me gatishmëri për marrëveshje appeared first on Gazeta Express.
