Ish-deputeti i Aleancës, Daut Haradinaj, ka hedhur sërish kritika ndaj partisë në pushtet, lidhur me kontratën për riparimin e vagonëve të trenit, e cila i është dhënë një kompanie serbe.
Anëtari i Aleancës ka thënë se prania dhe ndikimi i Serbisë në Kosovë, asnjëherë nuk ka qenë më e theksuar se deri më sot.
“Që nga çlirimi e deri më sot, asnjëherë më parë nuk kemi qenë më larg Shqipërisë, dhe asnjëherë më parë prania dhe ndikimi i Serbisë nuk kanë qenë më e theksuar brenda Kosovës. Ky regjim në ikje po i ngjason gjithnjë e më shumë një “Qeverie Krahinore” nën hijen e Beogradit, sesa udhëheqjes së një shteti sovran, të pavarur e dinjitoz.”, ka shkruar Haradinaj.
Ai ka adresuar edhe kritika të tjera lidhur me ndikimin në disa sektorë, që sipas tij, është duke i pasur Serbia në Kosovë.
“Kur sovranitetin ekonomik dhe atë energjetik ia dorëzon në duar Vuçiqit, dhe pavarësinë politike e trajton si një leckë duke shkelur ligjin, Kushtetutën e vendit, çfarë mund të pritet më shumë nga këta njerëz?! Nga këta njerëz që ditën shesin sovranizëm e patriotizëm me fjalë shqip, e natën kurdisin e punojnë për interesat e Serbise – 24/7.”, ka shkruar tutje ai.
Haradinaj ka thënë se kjo gjendje do të përfundojë shumë shpejt.
“Askush nuk është mbi ligjin, e aq më pak mbi Kushtetutën, e me së paku ata që e kanë shndërruar Kosovën në një shtëpi “pa zot shpije”, duke u shërbyer qendrave që synojnë zhbërjen e Kosovës dhe zbehjen e faktorit shqiptar në Ballkan. Gjithsecili sabotues dhe argat brenda këtij sistemi të dështuar, që thirret rrejshëm në emër të shqiptarisë, një ditë do të japë llogari para ligjit dhe para historisë! Tashmë marrja ju ka mbuluar. Do të përfundoni aty ku e keni vendin: në faqen më të zezë të mbeturinave të historisë kombëtare!”, ka thënë ai.
The post Daut Haradinaj: Kurrë s’kemi qenë më larg Shqipërisë, e kurrë nuk ka qenë më i theksuar ndikimi serb në Kosovë sesa tani appeared first on Gazeta Express.
