Jovana Radosavleviq, e cila më herët ka drejtuar organizatën joqeveritare “New Social Initiative” në veri të Kosovës dhe në zgjedhjet e fundit parlamentare ka kandiduar për Listën Serbe, ka zhvilluar takime me disa parlamentarë zviceranë në Bern.
Sipas një postimi të publikuar nga vetë Radosavleviq në rrjetet sociale, gjatë takimeve ajo ka diskutuar për, siç është shprehur, “pozitën e vështirë të popullit serb në Kosovë dhe Metohi”.
Ajo ka ngritur shqetësime lidhur me atë që e cilësoi si “presion institucional ndaj serbëve”, çështjet e sigurisë, mbylljen e institucioneve serbe në Kosovë dhe mosformimin e Asociacionit të Komunave me Shumicë Serbe.
“Parlamentarët zviceranë i njoftuam për pozitën e vështirë të popullit serb në Kosovë dhe Metohi, presionin e vazhdueshëm institucional, sfidat serioze të sigurisë, mbylljen e institucioneve dhe refuzimin e formimit të Bashkësisë së Komunave me Shumicë Serbe”, ka shkruar Radosavleviq.
Takimet janë mbështetur nga Ambasada e Serbisë në Zvicër dhe ambasadori serb në Bern, Ivan Trifunoviq. Një prej aktiviteteve ishte edhe një drekë pune e organizuar në kuadër të Grupit Parlamentar të Miqësisë Zvicër-Serbi.
Sipas Ambasadës së Serbisë në Bern, në takim morën pjesë 14 parlamentarë zviceranë, përfshirë bashkëkryetarët e grupit, Christian Imark dhe Sibel Arslan, kjo e fundit njëherësh kryetare e Komisionit për Punë të Jashtme të Parlamentit zviceran.
“Grupi Parlamentar i Miqësisë ka vazhduar të rritet në mënyrë të qëndrueshme, duke u rritur nga 17 anëtarë në dhjetor të vitit të kaluar në 23 anëtarë sot”, thuhet në njoftimin e Ambasadës së Serbisë në Bern.
Radosavleviq ishte kandidate e Listës Serbe në zgjedhjet parlamentare të mbajtura më 7 qershor. Gjatë fushatës zgjedhore, ajo kishte bërë thirrje për mbështetje të Listës Serbe, duke kërkuar që subjekti të siguronte të gjitha mandatet e garantuara për komunitetin serb në Kuvendin e Kosovës.
Lista Serbe mbetet subjekti politik dominues në mesin e komunitetit serb në Kosovë dhe prej vitesh ka qenë pjesë e debatit politik lidhur me raportet ndërmjet Prishtinës dhe Beogradit.
Today, the Embassy of Serbia hosted a working lunch for the 🇨🇭-🇷🇸 Parliamentary Friendship Group.
We were honoured to welcome two members of the Council of States and twelve members of the National Council, including the Group’s Co-Presidents Christian Imark and Sibel Arslan,… pic.twitter.com/cX2JOaDFHO
— Serbia in Switzerland (@SRBinSwiss) June 9, 2026
