Prokuroria Speciale e Republikës së Kosovës ka ngritur aktakuzë ndaj togerit të Policisë së Kosovës, Bojan Jevtiq, për veprat penale “Spiunazhi” dhe “Mbajtja në pronësi, kontroll ose posedim i paautorizuar i armëve”, nën dyshimin se për një periudhë të gjatë kohore kishte transmetuar dokumente sekrete tek Agjencia për Siguri dhe Inteligjencë e Serbisë (BIA).
Sipas aktakuzës, Jevtiq, i cili ushtronte detyrën e Shefit të Sektorit të Operativës në Stacionin Policor Kufitar, dyshohet se deri në momentin e arrestimit të tij më 17 korrik 2025, kishte mbledhur dhe shpërndarë dokumente të klasifikuara si “Konfidencial” dhe “Sekret”, të ndërlidhura me sigurinë kombëtare dhe rendin kushtetues të Kosovës.
Në dokumentin e Prokurorisë Speciale thuhet se informacionet janë dërguar tek zyrtarë të BIA-s serbe përmes aplikacioneve WhatsApp dhe Telegram, ndërsa përmendet edhe një zyrtar me nofkën “Qira”, me të cilin Jevtiq dyshohet se ishte takuar fizikisht edhe në Beograd.
Sipas Prokurorisë, veprimet e tij kanë rrezikuar rëndë sigurinë kombëtare, funksionimin e institucioneve dhe jetën e zyrtarëve të sigurisë dhe qytetarëve të Kosovës. Për këtë arsye, organi i akuzës ka kërkuar që dënimi të shqiptohet sipas paragrafit 6 të nenit 124 të Kodit Penal, i cili parasheh dënim nga 10 vjet burgim deri në burgim të përjetshëm.
“Nga një periudhë kohore e pacaktuar e deri më datë 17.07.2025, respektivisht deri në momentin e arrestimit të tij, i pandehuri [e redaktuar], në cilësinë e zyrtarit policor me gradën toger dhe në detyrën e Shefit të Sektorit të Operativës në Stacionin Policor Kufitar [e redaktuar], me dashje dhe në mënyrë të vazhdueshme, ka mbledhur, siguruar dhe transmetuar informacione dhe dokumente zyrtare të klasifikuara si ‘Konfidencial’ dhe ‘Sekret’, që ndërlidhen me sigurinë dhe rendin kushtetues të Republikës së Kosovës”, thuhet në aktakuzën për Bojan Jevtiqin, ka raportuar Koha gjatë së martës në mbrëmje.
Operacioni “Informatori”
Arrestimi i Jevtiqit ishte realizuar në kuadër të operacionit të koduar “Informatori”, pas një hetimi njëvjeçar të zhvilluar nga Prokuroria Speciale, Agjencia e Kosovës për Inteligjencë (AKI) dhe Inspektorati Policor i Kosovës (IPK).
Sipas raportimeve ekskluzive të televizionit Dukagjini, që kishte siguruar pamje ekskluzive nga aksioni, operacioni kishte nisur në orët e hershme të mëngjesit, kur hetuesit kishin ndaluar Jevtiqin derisa po shkonte në vendin e punës në pikën kufitare “Dheu i Bardhë”.
Drejtori i Hetimeve në IPK, Bardhyl Haxhimustafa, kishte deklaruar se dyshimet për spiunazh ishin vërtetuar përmes bashkëpunimit me AKI-në.
Pas arrestimit, hetuesit kishin kryer bastisje në shtëpinë e Jevtiqit dhe në zyrën e tij në pikën kufitare. Gjatë aksionit janë sekuestruar dokumente konfidenciale të Policisë së Kosovës, telefona mobilë, USB pajisje, një armë pa leje, municion, si dhe para të gatshme në vlerë prej 10 mijë eurosh, 2 milionë denarë serbë dhe 600 franga zvicerane.
Kryeshefi i IPK-së, Kushtrim Hodaj, e kishte cilësuar bashkëpunimin mes institucioneve të sigurisë si kyç për realizimin e operacionit.
Bojan Jevtiq kishte qenë pjesë e Policisë së Kosovës për 23 vjet dhe veprimtarinë kryesore e kishte ushtruar në rajonin e Anamoravës. Ai jetonte në një fshat të komunës së Kamenicës.
Rasti i tij është një ndër disa rastet e fundit të ndërlidhura me akuzat për spiunazh në Kosovë. Më herët, ish-polici Aleksandar Vlajiq ishte dënuar me pranim fajësie për spiunazh, ndërsa sivjet me gjashtë vjet burgim është dënuar në shkallë të parë edhe zyrtarja e OSBE-së, Jelena Gjukanoviq.
Ndërkohë, në paraburgim nën dyshimet për spiunazh vazhdon të mbahet edhe Fatmir Sheholli dhe disa të tjerë.
