Pas dy muajsh hetime të thelluara dhe përdorimit të metodave proaktive, Policia e Korçës ka finalizuar operacionin e koduar “Befasia 2”, duke goditur një rast të dyshuar të prodhimit dhe shitjes së lëndëve narkotike.
Dy të rinj janë arrestuar në flagrancë, ndërsa gjatë kontrollit të automjetit dhe banesës së njërit prej tyre janë sekuestruar lëndë e dyshuar narkotike Cannabis Sativa, fara të dyshuara narkotike dhe automjeti.
Njoftimi i policisë:
Korçë/Finalizohet pas 2 muajsh hetime me metoda proaktive, operacioni i koduar “Befasia 2”, për goditjen e veprimtarive kriminale në fushën e narkotikëve.
Sekuestrohen fara dhe sasi lënde të dyshuara narkotike Cannabis Sativa.
Kapen në flagrancë dhe vihen në pranga 2 shtetasit që e posedoin me qëllim shitjen.
Si rezultat i hetimeve të kryera me metoda proaktive, gjatë 2 muajve, për goditjen e veprimtarive kriminale të prodhimit dhe shitjes së lëndëve narkotike, specialistët e Seksionit për Hetimin e Narkotikëve, në bashkëpunim me shërbimet e Forcës së Posaçme “Shqiponja”, të DVP Korçë, finalizuan operacionin e koduar “Befasia 2”.
Në kuadër të këtij operacioni, u arrestuan shtetasit H. C., 28 vjeç, banues në fshatin Bilisht dhe Sh. D., 27 vjeç, banues në fshatin Eçemenik.
Shërbimet e Policisë kanë lokalizuar dhe ndaluar në rrugën e fshatin Eçemenik, automjetin me drejtues shtetasin H. C. dhe pasagjer shtetasin Sh. D. Gjatë kontrollit u gjet një qese me lëndë të dyshuar narkotike Cannabis Sativa, të cilën kanë tentuar ta hedhin nga automjeti i tyre, në momentin që janë afruar punonjësit e Policisë.
Në vijim, gjatë kontrollit në banesën e shtetasit H. C., u gjet një qese me fara të dyshuara narkotike Cannabis Sativa.
Sasi e lëndës narkotike, farat dhe automjeti u sekuestruan në cilësinë e provës materiale.
Materialet procedurale iu referuan Prokurorisë së Korçës, për veprime të mëtejshme, për veprën penale “Prodhimi dhe shitja e narkotikëve”, kryer në bashkëpunim.
The post Tentuan të hidhnin drogën nga makina për t’u shpëtuar policisë, arrestohen dy të rinj në Korçë appeared first on Gazeta Express.
