Inspektorati Qendror i Mbikëqyrjes së Tregut (IQMT), ka nisur aksionin e inspektimeve ndaj bizneseve që merren me kriptovaluta dhe këmbimore, me qëllim verifikimin e respektimit të kërkesave ligjore.
Gjatë ditës së parë janë kontrolluar 16 biznese në Prishtinë, Gjilan, Gjakovë, Prizren, Podujevë, Rahovec dhe Suharekë. Si rezultat, 6 subjekteve u është ndaluar ushtrimi i veprimtarisë për shkak të mungesës së dokumentacionit të detyrueshëm, ndërsa 6 biznese të tjera janë gjobitur për mungesë të dokumenteve ligjore.
IQMT njoftoi se aksioni do të vazhdojë ndaj më shumë se 268 bizneseve të regjistruara në ARBK me veprimtari të ndërmjetësimeve tjera monetare.
Inspektorati u ka bërë thirrje operatorëve ekonomikë që të pajisen me pëlqimet dhe licencat përkatëse nga institucionet përgjegjëse, përfshirë Ministrinë e Industrisë, Ndërmarrësisë dhe Tregtisë dhe Bankën Qendrore të Kosovës.
