Kryetari i Partisë Demokratike të Kosovës (PDK), Bedri Hamza, ka pritur sot në takim ambasadorin e Gjermanisë në Kosovë, Rainer Rudolph, me të cilin ka diskutuar zhvillimet e fundit politike në vend dhe krizën institucionale.
Sipas njoftimit të PDK-së, në takim është diskutuar për nevojën e konstituimit sa më të shpejtë të Kuvendit, respektimin e rendit kushtetues dhe sundimin e ligjit, si dhe për zhvillimin ekonomik dhe proceset integruese të Kosovës.
Hamza ka theksuar se funksionimi i shtetit dhe respektimi i Kushtetutës nuk mund të varen nga vullneti politik i një partie apo individi, por janë, sipas tij, detyrim institucional dhe bazë e demokracisë.
Kreu i PDK-së ka shprehur gjithashtu shqetësimin për atë që e ka cilësuar si precedent të krijuar nga refuzimi i partisë së parë në zgjedhje për të vepruar në përputhje me vendimet e Gjykatës Kushtetuese.
Në takim, Hamza ka rikonfirmuar se PDK-ja do të përdorë të gjitha mjetet demokratike dhe institucionale për mbrojtjen e Kushtetutës, institucioneve të Republikës dhe interesit të qytetarëve.
Ai ka thënë se PDK-ja mbetet e përkushtuar për një Kosovë demokratike, funksionale dhe ekonomikisht të zhvilluar, si dhe për integrimin e vendit në strukturat euroatlantike dhe forcimin e raporteve me aleatët strategjikë.
The post Hamza pret ambasadorin gjerman: Askush s’mund ta vendosë vullnetin politik mbi Kushtetutën appeared first on Gazeta Express.
