Ushtruesja e Detyrës së Presidentes së Republikës së Kosovës, Albulena Haxhiu, mori pjesë në ceremoninë e zbulimit të muralit “Çast” në komunën e Therandës, vepër e dedikuar të mbijetuarve të dhunës seksuale gjatë luftës në Kosovë.
Në fjalën e saj, Haxhiu theksoi rëndësinë e kujtesës kolektive dhe të drejtësisë për viktimat, duke e cilësuar muralin si një simbol që kujton një krim që nuk duhet harruar.
Ajo tha se çështja e të mbijetuarve nuk duhet të trajtohet vetëm si pjesë e së kaluarës, por edhe si çështje e drejtësisë, dinjitetit dhe mbështetjes institucionale.
Haxhiu përmendi emërimin e Vasfije Krasniqi Goodman dhe Shyrete Tahiri Sulimani si të dërguara të posaçme për çështjen e të mbijetuarve të dhunës seksuale gjatë luftës, si dhe hapjen e Zyrës për Mbështetjen e të Mbijetuarave dhe të Mbijetuarve në Presidencën e Kosovës.
Ajo ftoi të gjithë personat e prekur nga kjo dhunë që t’i drejtohen Presidencës për mbështetje dhe adresim të shqetësimeve të tyre.
Gjatë fjalës së saj, Haxhiu shprehu mirënjohje për Fondacionin Jahjaga, komunën e Therandës dhe artistët që realizuan muralin, duke theksuar se vepra kontribuon në ruajtjen e kujtesës dhe ndërgjegjesimit publik.
Sipas saj, murali “Çast” është një nderim për të mbijetuarit dhe një kujtesë e përhershme se ata nuk duhet të lihen kurrë vetëm.
