Kryetari i Odës Ekonomike të Kosovës, Lulzim Rafuna, ka vizituar qumështoren “VITA”, ku u prit nga drejtori Artan Spahija dhe stafi i kompanisë.
Gjatë vizitës, Rafuna u njoh nga afër me punën e kompanisë, procesin e prodhimit, investimet në makineri dhe teknologji, si dhe me bashkëpunimin e saj me fermerët vendorë.
Rafuna vlerësoi punën dhe zhvillimin e qumështores “VITA”, duke theksuar se investimet e vazhdueshme në teknologji, rritja e kapaciteteve dhe forcimi i bashkëpunimit me fermerët janë shembull i rëndësishëm i zhvillimit të prodhimit vendor.
“Investimet në makineri dhe teknologji, së bashku me lidhjen e qëndrueshme me fermerët, janë bazë për një industri më konkurruese. ‘VITA’ është një shembull i mirë se si investimi, puna dhe përkushtimi mund të ndërtojnë një produkt konkurrues jo vetëm në Kosovë, por edhe në tregjet e rajonit dhe të Bashkimit Evropian”, tha Rafuna.
Ai vlerësoi veçanërisht rritjen e numrit të fermerëve me të cilët bashkëpunon kompania, cilësinë e produkteve dhe përkushtimin për përmbushjen e standardeve ndërkombëtare.
“VITA” është një nga kompanitë që ka arritur të ndërtojë besueshmëri dhe reputacion në treg, ndërsa produktet e saj, përveç konsumatorëve në Kosovë, tashmë arrijnë edhe në tregjet ndërkombëtare.
Rafuna theksoi se zhvillimi i kompanive të tilla është i rëndësishëm për të gjithë zinxhirin e industrisë së qumështit, pasi përfitimet shtrihen nga fermerët dhe prodhuesit deri te konsumatori.
Ai bëri thirrje që institucionet të vazhdojnë të mbështesin prodhuesit vendorë, në mënyrë që investimet të rriten më tej, të forcohen kapacitetet prodhuese dhe produktet “Made in Kosova” të kenë prezencë edhe më të madhe në tregjet ndërkombëtare.
Oda Ekonomike e Kosovës do të vazhdojë të jetë pranë bizneseve vendore, duke promovuar investimet, prodhimin dhe rritjen e konkurrueshmërisë së tyre në tregjet vendore dhe ndërkombëtare.
The post Rafuna viziton qumështoren “VITA”: Investimet në teknologji dhe lidhja me fermerët, bazë për rritjen e prodhimit vendor appeared first on Gazeta Express.
