Gjykata Evropiane për të Drejtat e Njeriut (GJEDNJ) ka vendosur masë të përkohshme ndaj Serbisë, duke ndaluar dëbimin me forcë të familjeve rome në lagjen Vozdovac të Beogradit.
Masa vjen pasi autoritetet serbe kishin planifikuar prishjen e shtëpive të më shumë se 30 qytetarëve në zonën mes dy rrugëve në Beograd.
Në mesin e familjeve të rrezikuara janë 15 fëmijë, të moshuar dhe persona të sëmurë, ndërsa dëbimi do t’i linte pa strehim dhe do t’i përkeqësonte edhe më tej kushtet e tyre të jetesës.
Iniciativa A11, e cila kishte paralajmëruar për dëbimin, thotë se autoritetet serbe nuk kanë respektuar procedurat ligjore. Sipas saj, ligji kërkon që para një dëbimi të miratohet një plan zhvendosjeje dhe të zhvillohen konsultime me qytetarët e prekur – gjë që, sipas organizatës, nuk ka ndodhur në këtë rast.
Serbia, e cila ka ratifikuar Paktin Ndërkombëtar për të Drejtat Ekonomike, Sociale dhe Kulturore, është e detyruar të garantojë që dëbimet me forcë të mos i lënë njerëzit pa strehim.
A11 thekson se rasti nuk është i izoluar, por pjesë e një praktike që, sipas saj, prek në mënyrë të përsëritur komunitetin rom në Serbi.
Organizata ka mirëpritur ndërhyrjen e Gjykatës Evropiane, duke shpresuar se vendimi do të shërbejë si një precedent që i detyron autoritetet serbe të vendosin të drejtat dhe mirëqenien e qytetarëve më të margjinalizuar mbi praktikat diskriminuese të dëbimit.
The post Gjykata Evropiane lëshon urdhër për qeverinë serbe në lidhje me dëbimin me forcë të romëve appeared first on Gazeta Express.
