Kryesuesi i seancës konstituive të Kuvendit, Avni Dehari, tha se ajo që ndodhi para tri ditëve në Kuvendin e Kosovës është pikërisht ajo për të cilën ka “paralajmëruar”.
“Çdo përpjekje për ta vazhduar seancën pa një marrëveshje politike vetëm sa e tensionon më tej situatën dhe e rrit rrezikun e përplasjeve, madje edhe të konfliktit fizik brenda sallës së Kuvendit”.
Më pas deputeti më i vjetër i Kuvendit tha se ka “mirëpritur” ftesat për takime që dy bashkëpartiakët e tij, u.d. presidentja Albulena Haxhiu e kryeministri në detyrë, Albin Kurti, i kanë dërguar partive politike.
“Pas qëndrimit të ri të LDK-së, mirëpres ftesat për takime të kryetarit të Lëvizjes VETËVENDOSJE!, Albin Kurti, si dhe ftesat e Ushtrueses së Detyrës së Presidentes, znj. Albulena Haxhiu, për partitë politike për një takim konsultativ. Kosova ka nevojë për përgjegjësi politike, dialog dhe për një marrëveshje që e zhbllokon situatën institucionale dhe garanton funksionimin e qëndrueshëm të institucioneve”.
Më pas, Dehari pati një thirrje.
“Prandaj, si Kryesues i seancës konstitutive, u bëj thirrje të gjitha partive politike që të ulen së bashku, ta marrin përgjegjësinë që u takon dhe ta gjejnë zgjidhjen politike që i hap rrugë konstituimit të Kuvendit, formimit të Qeverisë dhe marrëveshjes për Presidentin konsensual. Konstituimi i Kuvendit dhe formimi i Qeverisë pa një marrëveshje paraprake për Presidentin nënkupton zgjedhje të parakohshme, diçka që duhet ta evitojmë. Qytetarët e Kosovës janë thirrur të vendosin me votën e tyre tri herë brenda dy vjetëve të fundit. Populli ka folur. Tani është radha jonë, si përfaqësues politikë, të gjejmë marrëveshjen dhe t’i japim vendit institucione funksionale dhe të qëndrueshme”.
The post Dehari e përdor si pretekst qëndrimin e ri të LDK’së për të mos thirrë seancë -përmend ftesat e Kurtit dhe Haxhiut appeared first on Gazeta Express.
