Ambasadori i Kosovës në Gjermani, Faruk Ajeti, ka njoftuar se Aeroporti i Mynihut ka korrigjuar një paraqitje të pasaktë të Kosovës në një reklamë për fluturimet e Air Serbia.
Sipas Ajetit, në reklamën e publikuar nga aeroporti, Kosova ishte paraqitur gabimisht si pjesë e Serbisë, ndërsa pas reagimeve të qytetarëve dhe angazhimit diplomatik, kjo pasaktësi është korrigjuar.
“Ky është një shembull tjetër i qartë se reagimi qytetar dhe diplomacia aktive japin rezultate konkrete”, ka shkruar Ajeti.
Ambasadori u ka bërë thirrje qytetarëve që të njoftojnë Ambasadën e Kosovës në Gjermani në rast se hasin raste ku Republika e Kosovës apo qytetet e saj nuk paraqiten në mënyrë korrekte nga institucione apo kompani gjermane.
Ai ka kërkuar që këto raste të shoqërohen me dëshmi përkatëse, në mënyrë që të mund të adresohen dhe korrigjohen.
