Ushtruesja e detyrës së Presidentes së Kosovës, Albulena Haxhiu, ka kujtuar martirët e Qyshkut, Zahaqit dhe Pavlanit, në 27-vjetorin e masakrës.
“Atë mëngjes, Qyshku, Zahaqi dhe Pavlani u goditën si pjesë e një operacioni të organizuar të forcave ushtarake, policore dhe paramilitare serbe. Gratë, fëmijët dhe të moshuarit u dëbuan nga shtëpitë, ndërsa burrat u ndanë, u plaçkitën, u mbyllën në shtëpi dhe u vranë. Më pas, shtëpitë u dogjën për t’i mbuluar gjurmët e krimit”, ka thënë u.d. e presidentes, Haxhiu.
Ajo më tej ka thënë se në këto fshatra u goditën njerëz të paarmatosur, banorë e mysafirë që lufta i kishte gjetur aty.
“U shuan jetë, u prekën familje të tëra, u dogjën shtëpi dhe u dëbuan civilë shqiptarë nga vendi i tyre. Qyshku, Zahaqi dhe Pavlani mbeten dëshmi e një mizorie të planifikuar, e një aparati shtetëror që e ktheu vrasjen e shqiptarëve në metodë lufte dhe dëbimin në qëllim politik”, tha ajo.
Sipas saj, drejtësia për këto masakra është detyrim ndaj familjeve, ndaj të mbijetuarve dhe ndaj vetë Kosovës.
