Seanca konstituive e Kuvendit të Kosovës do të vazhdojë sot në orën 14:00. Kjo është bërë e ditur përmes njoftimit zyrtar të Kuvendit.
Në rend dite mbetet zgjedhja e nënkryetarëve të Kuvendit.
“Vazhdimi i Seancës Konstituive
Rendi i ditës:
Zgjedhja e nënkryetarëve të Kuvendit.
Vendi: Salla e seancave
Koha: 14:00”, thuhet në njoftimin e Kuvendit.
Seanca e orës 11:00, e cila kishte nisur me vonesë, u ndërpre pasi deputetët e Partisë Demokratike të Kosovës (PDK) lëshuan sallën, pas mosvotimit të kandidates së tyre për nënkryetare, Vlora Çitaku.
Çitaku nuk mori mbështetjen e deputetëve të Lëvizjes Vetëvendosje (LVV), ndërsa deputetët e PDK-së më pas u larguan nga salla.
Kryetarja e Kuvendit, Albulena Haxhiu, e ftoi PDK-në që të bëjë një propozim të ri për këtë pozitë, por një propozim i tillë nuk u bë.
“Seanca ndërpritet. Për vazhdimin e seancës do të njoftoheni më pas”, kishte deklaruar Haxhiu.
Para ndërprerjes, Ardian Gola i LVV-së u zgjodh nënkryetar i Kuvendit me 101 vota për. Deputetët e PDK-së e mbështetën kandidaturën e Golës, ndërsa kandidatura e Vlora Çitakut nuk mori mbështetjen e nevojshme.
Tashmë, deputetët pritet të rikthehen në sallë në orën 14:00, për të vazhduar procesin e zgjedhjes së nënkryetarëve të Kuvendit.
