Udhëheqësja e Partisë Radikale vdiq sot në Romë, në moshën 78-vjeçare. Karrierën politike e nisi me fushatën për legalizimin e abortit.
Tipari përcaktues i karakterit të Emma Boninos ishte ndershmëria intelektuale. Një shembull është fushata, të cilën ajo e mbështeti me zjarr, idhur me akuzat për korrupsion ndaj Presidentit të Republikës, Giovanni Leone, si dhe kërkimfalja e saj e sinqertë dhe publike pasi u vërtetua pafajësia e ish-presidentit.
Karrierën politike e nisi me fushatën për legalizimin e abortit, duke u vetëdenoncuar për veprën penale të ndihmës në kryerjen e një aborti. Për këtë çështje, e cila zuri një vend qendror në angazhimet e saj, Bonino mbajti qëndrime skajore, që nuk kufizoheshin vetëm në kërkesën për dekriminalizimin e abortit, por e konsideronin atë një të drejtë themelore, pa treguar mirëkuptim për argumentet e atyre që mbrojnë jetën që nga momenti i ngjizjes.
Krahas fushatave për të drejtat civile në Itali, të cilat i udhëhoqi në krye të Partisë Radikale së bashku me Marco Pannellan, ajo nisi që në fillim të viteve 1980 edhe fushata për të drejtat civile në Evropën Lindore. Bonino bëri fushatë për krijimin e një Gjykate Penale Ndërkombëtare, e cila më vonë u themelua, pjesërisht edhe falë këtij presioni.
Ajo udhëtoi në Varshavë për të protestuar kundër diktaturës së gjeneralit Jaruzelski, ku u arrestua dhe më pas u dëbua. Në Nju Jork, për të sfiduar një ligj që ndalonte shitjen e shiringave pa recetë, ajo shpërndau publikisht shiringa dhe lejoi që të arrestohej.
U takua me Dalai Lamën për të mbështetur të drejtat e popullit tibetian, duke sfiduar qeverinë kineze.
Edhe në arenën ndërkombëtare ajo u bë një nga zërat e luftës kundër urisë, përmes nismave me jehonë të madhe publike, të cilat u vlerësuan edhe nga Papa Gjon Pali II, i cili e priti atë në Vatikan.
Edhe ky ishte një tregues i frymës me të cilën Bonino iu qasej secilës prej betejave të saj, kërkonte mirëkuptim dhe dialog konstruktiv me këdo që ndante me të një objektiv të caktuar, edhe kur pikëpamjet e tyre më të gjera dallonin thellësisht nga të sajat.
Fushata e saj kundër dënimit me vdekje, e mbështetur nga të gjitha partitë politike, bëri që ajo ta përfaqësonte Italinë në Kombet e Bashkuara gjatë sesionit kushtuar “moratoriumit të dënimit me vdekje”.
Në vitin 1994, ajo u zgjodh deputete në zonën elektorale të Padovës si pjesë e qendrës së djathtë, ndërsa në zgjedhjet evropiane të po atij viti u zgjodh në listën Pannella. Megjithatë, më pas hoqi dorë nga mandati në Parlamentin Evropian, duke zgjedhur të qëndronte në Parlamentin italian.
Në vitin 1995, qeveria Berlusconi e emëroi Komisionere Evropiane dhe ajo udhëtoi menjëherë drejt Sarajevës dhe Mostarit për të denoncuar pafuqinë e Evropës dhe të OKB’së përballë gjenocideve etnike në Bosnjë dhe Hercegovinë.
Bonino mbështeti gjithashtu ndërhyrjen në Kosovë, edhe pse për këtë u përplas me miqtë e saj pacifistë.
Me të njëjtën frymë, ajo udhëtoi në Ruandë, Somali, Sudan, Kurdistanin irakian dhe Afganistan.
Në vitin 2001 u shpërngul në Kajro për të mësuar arabishten dhe më pas nisi një program të shqyrtimit të shtypit arab në Radio Radicale.
Pas një periudhe afrimi me Forza Italia dhe një faze të autonomisë së Partisë Radikale, ajo iu bashkua qeverisë së qendrës së majtë të Romano Prodit si ministre për Tregtinë Ndërkombëtare dhe Çështjet Evropiane.
Ajo punoi gjithashtu për barazimin e moshës së pensionimit të burrave dhe grave, një masë që u bë ligj në vitin 2012.
Në vitin 2013, ajo u bë ministre e Jashtme në qeverinë e Enrico Lettas.
Në vitet e fundit, Bonino ishte mbështetëse dhe, herë pas here, edhe kritike e lëvizjes Più Europa, e cila në fund e zgjodhi atë presidente.
Karriera e saj e gjatë politike dëshmon një qëndrueshmëri të thellë të ideve, të cilat ajo i shprehu në mjedise dhe krahë politikë të ndryshëm, madje edhe të kundërt.
Ishte shprehja e një gruaje që mendonte me kokën e saj, duke kërkuar të ndikonte mbi grupimet politike, e jo të ndikohej prej tyre.
The post Vdes Emma Bonino, politikania dhe aktivistja italiane që mbështeti ndërhyrjen e NATO-s në Kosovë appeared first on Gazeta Express.
