Deputeti i Lëvizjes Vetëvendosje, Ilir Kërçeli, ka komentuar situatën e krijuar në Kuvendin e Kosovës, ku edhe sot ka dështuar procesi i zgjedhjes së nënkryetarëve dhe rrjedhimisht konstituimi i plotë i Kuvendit.
I ftuar në emisionin “Kënd i Debatit” në Tëvë1, Kërçeli ka komentuar mënyrën se si deputeti i Listës Serbe, Igor Simiq, është propozuar sot për pozitën e nënkryetarit të Kuvendit.
Kërçeli ka thënë se gjatë ditës në rrjetet sociale janë shpërndarë materiale që pretendojnë se një formulim i ngjashëm është përdorur edhe në vitin 2021. Megjithatë, sipas tij, deklarata e bërë sot dallon nga ajo e përdorur në atë kohë.
“Këtu duhet të bëjmë një dallim. Në vitin 2021, deputeti i cili e ka përfaqësuar Listën Serbe ka filluar duke e falënderuar kryesuesin e Kuvendit dhe ka thënë se, në emër të Listës Serbe, për nënkryetar të Kuvendit nga radhët e popullit serb. Ndërsa kjo e vitit 2026 është shumë më e rrezikshme”, ka deklaruar Kërçeli.
Sipas tij, dallimi qëndron në mënyrën se si është referuar përfaqësuesi i Listës Serbe, duke e vënë theksin te përdorimi i shprehjes “populli serb”.
“Ne e shohim një incizim që ka dashur të na ndodhë në Republikën e Kosovës, kur shohim dje që krejt populli serb del dhe e pret në funeral një kriminel siç ka qenë Ratko Mlladiqi, dhe kur sot del përfaqësuesi i Listës Serbe duke mos përmendur askund ‘Lista Serbe’, por ‘në emër të popullit serb’ – cilit popull serb? Popullit serb të Serbisë apo popullit serb të Republikës Srpska?”, ka thënë Kërçeli.
Ai ka thënë se kjo çështje, sipas tij, duhet të trajtohet me kujdes, duke theksuar se përdorimi i termit “popull” në kontekstin e komuniteteve duhet të jetë në përputhje me përcaktimet kushtetuese.
“Për këto deklarata që janë shpërndarë në rrjete sociale, të cilat janë shkëputur dhe prerë, dua të jap një shpjegim. Termi ‘popull’ si sinonim i komunitetit mund të përdoret, mirëpo Kushtetuta e ka caktuar se si duhet të përdoret dhe kur duhet të përdoret”, është shprehur ai.
Kërçeli ka shtuar se, sipas tij, institucionet e Kosovës nuk duhet të lejojnë që Kuvendi të përdoret për agjenda politike që lidhen me Serbinë apo me presidentin serb, Aleksandar Vuçiq.
“Këta nuk do ta lejojmë”, ka deklaruar Kërçeli.
Deklaratat e tij vijnë në një kohë kur Kuvendi i Kosovës vazhdon të përballet me vështirësi në përmbylljen e procesit të konstituimit, për shkak të moszgjedhjes së nënkryetarëve.
The post Deputeti i VV thotë se në 2021 Simiq foli në emër të Listës Serbe: Në 2026 në emër të popullit serb appeared first on Gazeta Express.
